Šviejcarskija śpiecsłužby sarvali mahčymuju špijonskuju apieracyju rasiejskich ahientaŭ, jakija nazvali siabie santechnikami ŭ Davosie, dzie prachodzić Suśvietny ekanamičny forum. Jak paviedamlaje «Jeŭrapiejskaja praŭda», u aŭtorak pra zdareńnie pisała šviejcarskaja hazieta Tages-Anzeiger.
Pa dadzienych vydańnia, u žniŭni minułaha hoda palicyja Šviejcaryi praviała pravierku dvaich rasijan na harnałyžnym kurorcie. Pa dadzienych haziety, «santechniki» pakazali dypłamatyčnyja pašparty, a potym pakinuli krainu.
Palicyja kantona Hrysan na ŭschodzie Šviejcaryi zajaŭlaje, što pamiž vizitam rasiejcaŭ u Davos i Suśvietnym ekanamičnym forumam nie dakazana suviaź.
«Heta praŭda, što my pravieryli dvaich hramadzian Rasii ŭ Davosie, i jany pakazali nam dypłamatyčnyja pašparty, ale my nie zmahli znajści pryčynu dla ich zatrymańnia. Tamu im dazvolili vyjechać», — skazała pres-sakratar. Jana dadała, što palicyja nikoli nie nazyvała ich «santechnikami».
Hienieralny dyrektar Hermitage Capital Bił Braŭder, jaki vioŭ kampaniju pa pakarańni rasijskich čynoŭnikaŭ pa spravie śmierci advakata Siarhieja Mahnickaha, zajaviŭ, što vyjaŭlenyja rasijskija ahienty płanavali apieracyju suprać jaho. Pa jaho słovach, jamu pra heta paviedamiła słužba biaśpieki Šviejcaryi.
«Rasiejcy nacelvajucca na ŭsich svaich vorahaŭ u roznych krainach. U ich vielizarnyja resursy, a Davos — važnaje miesca. I heta miesca, kudy ja mahu asabista pryjści, kab kinuć vyklik rasijskim čynoŭnikam z nahody zabojstva jurysta Siarhieja Mahnickaha», — zajaviŭ Braŭder u intervju Reuters.
Viadoma, što hetymi dniami ŭ šviejcarskim Davosie pravodzicca štohadovy Suśvietny ekanamičny forum.
