Na minułym tydni hienieralny dyrektar chakiejnaha «Dynama» publična paprasiŭ u pryvatnaha biełaruskaha biznesu hrošaj i paznačyŭ pryčyny: «Dziaržaŭnaje finansavańnie niaŭchilna skaračajecca».
Sapraŭdy, Łukašenka jašče ŭ 2016-m pahražaŭ zmusić «Dynama» da samastojnaha pošuku srodkaŭ, paŭtarajučy potym heta z hodu ŭ hod.
Ale, vidać, pahroza stała realnaj tolki ciapier.
Fota z sajta «Dynama»
Viadoma, što biudžet «Dynama» składajecca z hrošaj, jakija pieravodziać «sponsary» kłuba — dziaržaŭnyja arhanizacyi.
Znajomyja ź finansavymi spravami kłuba śćviardžajuć, što biudžet imkliva skaračaŭsia i prasieŭ z prykładna 15 miljonaŭ dołaraŭ dva hady tamu da 5 miljonaŭ dołaraŭ sioleta. Pryčyny — u chranična padvalnych miescach «Dynama» u tablicy KCHŁ.
Ale navat tyja piać miljonaŭ sioleta ledź naźbirali, bo asnoŭny sponsar, «Biełaruśkalij», daŭ utraja mienš zapytanaj sumy, hetuju dzirku zakryvaŭ MTZ.
Kudy iduć hrošy? Viadoma, asnoŭnyja vydatki kłuba — heta zarobki chakieistaŭ.
U siezonie 2018—2019 «Dynama» užo pačało pazbaŭlacca ad kantraktaŭ-miljońnikaŭ (što aznačaje hanarar chakieista ŭ miljon dołaraŭ za siezon ci bolš).
Apošni taki kantrakt, peŭna, byŭ u fina Ciejemu Pułkiniena, jakoha ŭ vyniku «zdali» u maskoŭskaje «Dynama», akupiŭšy na ŭhodzie pałovu sumy jaho kantraktu.
Ciapier, jak kažuć abaznanyja, maksimalny zarobak niekatorych lehijanieraŭ — u rajonie 400 tysiač dołaraŭ za siezon, a Kaścicyn-starejšy, naprykład, atrymlivaje blizu 200 tysiač dołaraŭ.
«Moładź» kamandy-aŭtsajdara zarablaje mienš: kala $ 50 tysiač dołaraŭ. Ale heta vymušanaja ličba, bo sama liha vystaŭlaje nižnija limity zarobkaŭ u kłubach.
Niepubličnaja ličba nižniaha zarobku ŭ KCHŁ dla chakieista ad 22 hadoŭ — $47 tysiač, płacić mienš zabaroniena.
Tak jany sprabujuć trymać niejki «prestyž».
Ale zvyčajna, z ulikam bonusaŭ, zarablajuć chakieisty jašče bolš.
Biełaruskaja Fiederacyja chakieja chiba nie adzinaja, chto badajecca z KCHŁ za hety punkt i sprabuje dabicca panižeńniaŭ limitu, bo va ŭnutranym čempijanacie Biełarusi, naprykład, nižni limit zarobku — $12 000, a vierchni — $25 000, udvaja mienšy za nižni KCHŁ.
Što z samaakupnaściu kamandy? Krynicy, blizkija da «Dynama», śćviardžajuć, što pa ŭsioj lizie KCHŁ vydatnym vynikam ličycca 5% samaakupnaści, a «Dynama», maŭlaŭ, da ich jašče nie siahaje — akuplajecca tolki «ofis», pad čym razumiejecca mieniedžmient i markietynh.
Tamu niajasnaj zastajecca pryčyna pryvabnaści inviestycyj u «Dynama», a jaho budučynia ŭ KCHŁ bieź dziaržaŭnych datacyj vyhladaje tumannaj — na nastupny siezon hrošaj davać nie chočuć.
Adzin sa spartyŭnych funkcyjanieraŭ prakamientavaŭ «Našaj Nivie» situacyju z «Dynama» tak: «Niama hrošaj — niama čaho mučycca. Kab być naroŭni z najlepšymi, treba i płacić pa suśvietnych cenach, ale dzie hetyja hrošy ŭziać? I ŭsio roŭna stvarajecca situacyja, kali my sprabujem płacić kankurentnyja zarobki, ale łuzieram, u nadziei, što jany pačnuć hulać, ale cudaŭ nie byvaje», — koratka skazaŭ jon.
My spytalisia taksama ŭ pres-sakratara «Dynama» Ramana Stranhina ab finansavym stanoviščy kłuba, a taksama ab płanach kamandy na vypadak, kali inviestary nie znojducca.
«Ničoha nie mahu kamientavać, heta kamiercyjnaja tajamnica. Ale miesca «Dynama» u KCHŁ nie pad pahrozaj», — zapeŭniŭ jon.
