Pra heta Alaksandr Łukašenka zajaviŭ siońnia pry zaćviardžeńni rašeńnia na achovu Dziaržaŭnaj miažy orhanami pamiežnaj słužby ŭ 2020 hodzie, paviedamlaje BiełTA.
Alaksandr Łukašenka adznačyŭ, što pamiežnaja biaśpieka — najvažniejšaje pytańnie dziaržaŭnaj palityki, tamu štohod na zaćviardžeńnie prezidenta vynosicca rašeńnie na achovu miažy.
«Na žal, vyklikaŭ i pahroz pamiežnaj biaśpieki hod ad hodu nie stanovicca mienš», — kanstatavaŭ kiraŭnik dziaržavy.
Pavodle jaho słoŭ, rastuć patoki niezakonnaj mihracyi, abjomy kantrabandy narkotykaŭ i inšych srodkaŭ złačynnaj dziejnaści. «Pavialičvajecca vajennaja aktyŭnaść pa toj bok miažy. Pry hetym Biełaruś nikoli nikomu nie pahražała i pahražać nie źbirajecca jak u śfiery ekanomiki, tak i ŭ vajennaj śfiery, — zajaviŭ jon. — Havoračy pra ekanomiku, ja maju na ŭvazie apošnija zajavy i škvał krytyki ŭ naš adras z boku Rasii, što my nibyta pahražajem ci to spynić pastaŭki nafty na Zachad, ci to vylilisia pahrozami, što budziem brać naftu z tranzitnaha naftapravoda dla zabieśpiačeńnia našych NPZ».
Alaksandr Łukašenka padkreśliŭ: pamiž Biełaruśsiu i Rasijaj aficyjna zamacavanaja damoŭlenaść na pastaŭku 24 młn t nafty. «Voś i ŭsio», - zaŭvažyŭ jon.
U minułym hodzie Łukašenka pryniaŭ rašeńnie pavialičyć štatnuju kolkaść pahraničnaha viedamstva, kab umacavać dziejsnyja padraździaleńnia na miežach, stvaryć novyja zastavy i bajazdolnyja manieŭranyja hrupy, likvidavanyja paśla raspadu Savieckaha Sajuza. Takija padraździaleńnia pavinny piśmienna i efiektyŭna prymianiacca ŭ achovie pahraničnych rubiažoŭ, a dla apieratyŭnaha vyrašeńnia zadač u roznych umovach asnaščacca sučasnymi ŭzorami ŭzbrajeńnia i techniki, adznačyŭ kiraŭnik dziaržavy.
