Zasnavalnik partała Tut.by Juryj Zisier u videaintervju Dev.by prajšoŭsia pa svaim hałoŭnym kankurencie na miedyjapoli — partale Onliner.by.
«Adzin raz my ŭsio ž skapijavali chady kankurenta. Pamiatajecie, hadoŭ siem tamu «Anłajnier» abvieściŭ kryžovy pachod suprać «Tutbaja». U ich pačała žachliva raści naviedvalnaść. My kožny miesiac źbiralisia z tryvohaj, nazirali. I kali ich naviedvalnaść stała ŭsiaho ŭ paŭtara razu mienš za našuju, da mianie dajšło, u čym sprava.
U «nulavyja», kali my pačynali, heta była aŭdytoryja aktyŭnaja, z vyšejšaj adukacyjaj. A ŭ «dziasiatych» hadach u internet pavaliŭ aby-chto, usie zapar, u tym liku i telehledačy. Im zachaciełasia zabavak, heta absalutna naturalna. I pakolki «Anłajnier» staŭ publikavać haračyja žoŭtyja naviny — niejkija tam repartažy z pasiedžańniaŭ kaapieratyvaŭ, niejkija dzieŭki tam byli, konkursy… I rejtynh pačaŭ raści. I tady my vyrašyli ŭ vialikaj stupieni hety chod skapijavać i taksama pačali publikavać žoŭtyja naviny. I takim čynam spynili nastup «Anłajniera», — patłumačyŭ jon.
Takija farmuloŭki vyklikali abureńnie zasnavalnika «Anłajniera» Vitala Šuraŭki.
«Karaciej, tut naš kaleha Zisier u niejkim intervju skazaŭ, što, maŭlaŭ, «Anłajnier» žoŭty i hetak dalej. Tym časam na najsurjoźniejšym resursie», — napisaŭ jon u tvitary, nie chavajučy maciukoŭ, i vykłaŭ skrynšoty navinaŭ Tut.by u instahramie.
«Rasijski futbalist pakazaŭ adkrytaje fota žonki. U majtkach i ź nieachajnym pučkom». «U Homieli mužčyna zaciahnuŭ dziaŭčynu da voziera i zhvałciŭ. Nie dajšła da domu niekalki mietraŭ». «6 trendaŭ u žanočaj intymnaj hihijenie. Daktary suprać hetaha!»
«My takuju zaškvarnuju ***niu na sajcie nie pišam. Byvaje, kaniečnie, usiakaje, ale nie takoje ž ha*nišča, jak z ruskaj kantekstnaj rekłamy», — padsumavaŭ Vital Šuraŭka.
