A ŭ lutym z chłopcam źviazalisia supracoŭniki ambasady i paviedamili, što jamu admoŭlena. Vyjaviłasia, što Žodzinskaja padatkovaja inśpiekcyja znajšła niaspłačanyja padatki na dachody z-za miažy za dva hady.
«Ja byŭ šakavany, jak takoje naohuł mahčyma. Uličvajučy, što ja nijakich hrošaj nikoli nie atrymlivaŭ», — aburajecca Alaksiej.
Kali ŭ padatkovaj jamu nazvali daty, u jakija nibyta pastupaŭ dachod, jon vyvučyŭ svoj bankaŭski rachunak. I pabačyŭ, što ŭ tyja dni jamu viartali hrošy roznyja zamiežnyja servisy.
Naprykład, $23 pryjšło ad płatformy pa zdymu arendnaha žylla Airbnb. Kali Alaksiej adpačyvaŭ na Malcie, jon braniravaŭ žyllo praz hety servis. Ale z apartamientami byli prablemy, tamu haspadynia viartała chłopcu na kartku častku spłočanaj sumy.
U dachody zapisali taksama $7 i $6, viernutyja Apple Music.
«Ja kupiŭ padpisku, sumu zdymajuć na miesiac napierad. Potym vyrašyŭ pierastać karystacca servisam, voś i viarnuli košt miesiačnaj padpiski», — tłumačyć Alaksiej.
U vypisku trapili taksama daty, kali chłopiec praź infakijosk u Minsku pakłaŭ sabie na kartku $25. A taksama kali atrymaŭ nazad zakład, spłočany za ŭdzieł ŭ adukacyjnaj prahramie.
Ahułam naźbirałasia kala $100 «dachodaŭ».
Chłopiec dadaje, što jamu daviałosia pisać tłumačeńni pa kožnym punkcie, adpraŭlać listy ŭ Ministerstva pa padatkach i zborach.
«Dva dni ja apraŭdvaŭsia. Tolki na adnyja zvanki patraciŭ dalaraŭ 30», — narakaje jon.
Atrymlivajecca, padatkovaja aŭtamatam razhladaje viartańnie hrošaj zamiežnymi servisami jak dachod?
«My bačym, što dachod atrymany ad niejkaj zamiežnaj jurasoby — my ž nie viedajem sutnaść hetaha pieravodu»,
— kamientuje načalnik adździeła padatkaabkładańnia fizičnych asob Žodzinskaj padatkovaj inśpiekcyi Uładzimir Stryhun.
Jon kaža, što, kab u orhanaŭ nie ŭźnikła pytańniaŭ da hetych apieracyj, treba davać tłumačeńnie pa kožnaj. Inakš hetyja hrošy paličać apłataj za pracu i patrabujuć z vas padatak.
«Fizičnaja asoba moža pryjści ŭ padatkovuju inśpiekcyju i dać piśmovaje tłumačeńnie. Možna padać jaho praz asabisty kabiniet na partale ministerstva ci dasłać pa pošcie. Kali jość dakumienty, jakija paćviardžajuć, što čałaviek pieraličyŭ hrošy, a potym taja jurasoba ich viarnuła, značyć, treba ich prykłaści», — apisvaje miechanizm Uładzimir Stryhun.
Takija tłumačeńni pa atrymanych z-za miažy hrošach padajucca raz na hod nie paźniej za 31 sakavika.
