Alaksandr Łukašenka nakiravaŭ spačuvańnie rodnym i blizkim maršała Savieckaha Sajuza Dźmitryja Jazava, paviedamlaje BiełTA.
Kiraŭnik dziaržavy padkreśliŭ, što Maršał Savieckaha Sajuza Dźmitryj Jazaŭ — sapraŭdy hieraičnaja i lehiendarnaja asoba, a jaho bajavy, prafiesijny i žyćciovy šlach — jarki ŭzor čałaviečaj hodnaści, ćviordaści voli i stojkaści charaktaru.
«Samaachviarna addany abaviazku i Radzimie, Dźmitryj Cimafiejevič z honaram vytrymaŭ surovyja vyprabavańni Vialikaj Ajčynnaj vajny. Jak praŭdzivy pradstaŭnik pakaleńnia pieramožcaŭ usie svaje siły jon addavaŭ vychavańniu maładych patryjotaŭ, adkazna staviŭsia da vialikaha podźvihu savieckaha naroda», — havorycca ŭ spačuvańni.
Alaksandr Łukašenka adznačyŭ, što śvietłaja pamiać pra Dźmitryja Jazava nazaŭsiody zachavajecca ŭ sercach biełarusaŭ.
Jazaŭ naradziŭsia ŭ 1924 hodzie pad Omskam. U 1962 h. padčas Karybskaha kryzisu motastrałkovy połk Jazava pierakinuli na Kubu. U 1987-1991 hadach Jazaŭ kiravaŭ Minabarony SSSR. U 1990 hodzie jamu prysvoili zvańnie maršała. Byŭ členam HKČP.
U sakaviku 2019 hoda Jazava pryznali vinavatym u vajennych złačynstvach pa spravie ab padziejach 13 studzienia 1991 hoda ŭ Vilni. Jaho zavočna prysudzili da 10 hadoŭ pazbaŭleńnia voli.