Kazachski žurnalist Borat
Dvaccaci dźviuch chvilinaŭ pakazu trejlera «Bruna», novaj stužki Sašy Barona-Koena, aŭtara i vykanaŭcy hałoŭnaj roli ŭ filmie «Borat», dość, kab zrazumieć: u paraŭnańni z novym filmam, cyničny, źjedlivy i vulharny Borat byŭ tolki razahrevam.
Ekscentryčny žurnalist Bruna choča ŭsynavić čornaje dzicia, kab źniać ź im vyčvarny art-film. Jon apytvaje źniatych schavanaj kamieraj zvyčajnych ludziej, ci nie zhodnyja jany, kab ich dzieci taksama zdymalisia ŭ stužcy, ci nie suprać jany, kab na ich naščadkaŭ nackoŭvali hadaŭ i vosaŭ i ci nie zhodnyja baćki, kab ich dzietak kidali z 4-ha pavierchu.
Try hady tamu prajšoŭ film «Borat», pra kazachskaha žurnalista, z natury šavinista i sieksista, jaki padarožničaje pa ZŠA. Meta žurnalista: zrabiŭšy repartaž dla kazachskaha telebačańnia, paznajomić kazachstancaŭ z amierykanskim ładam žyćcia, a taksama skraści dla siabie žonku, eratyčnuju zorku Pamiełu Andersan. «Borat» uźniaŭ chvalu abureńnia ŭ Kazachstanie i Rasiei i navat nie išoŭ u biełaruskim prakacie.
Jak i Borat, Bruna taksama naradziŭsia jak piersanaž z televizijnaj pieradačy «Šoŭ Eli Džy», što tranślavałasia 9 hadoŭ tamu pa anhielskim telebačańni. Bruna, karespandent mody i šoŭ-biznesa nieisnujučaha aŭstryjskaha kanału, choča dać vychad svaim pačvarnym schilnaściam i pravakuje admoŭnuju reakcyju z boku ludziej, što nibyta vypadkova trapili ŭ kadr.
