Halina Šastoŭskaja zhareła za 5 dzion.
54-hadovaja rabotnica cecha fabryki «Čyrvony Kastryčnik» Halina Šastoŭskaja zachvareła na pnieŭmaniju 23 sakavika i pamierła 28 sakavika, piša TUT.BY. 29 sakavika doktar paviedamiŭ jaje dačce, što analiz na karanavirus byŭ stanoŭčy. Tamu žančynu chavali ŭ zakrytaj trunie.
Adnak 31 sakavika Minzdaroŭja abviaściła pra pieršuju śmierć ad karanavirusa — zasłužanaha artysta Biełarusi Viktara Daškieviča, jaki pamior u toj ža dzień i pra śmierć jakoha siamja ŭ toj ža ranak paviedamiła ŭ ŚMI. Pry hetym Minzdaroŭja i inšyja pradstaŭniki ŭładaŭ akcent zrabili na tym, što heta byŭ stary čałaviek, abciažarany chraničnymi chvarobami.
Pra śmierć Haliny Šastoŭskaj aficyjnaj infarmacyi nie było dahetul, i tamu jaje siamja vyrašyła raskazać jaje historyju ŭ ŚMI.
Šastoŭskaja pracavała na fabrycy, jakaja z 14 sakavika była zakrytaja na karancin — imavierna, u suviazi z vyjaŭleńniem karanavirusa ŭ rabotnikaŭ.
Dačka žančyny Hanna Sałaŭjova raskazvaje, što ni kašlu, nijakich inšych simptomaŭ u mamy nie było. Turbavaŭ tolki pavyšany cisk. Ź im jana i pajšła ŭ palikliniku 23 sakavika. Tam razumny doktar adpraviŭ žančynu na fluarahrafiju. Vyśvietliłasia, što ŭ jaje — pnieŭmanija pravaj vierchniaj doli lohkaha. Joj dali nakiravańnie ŭ supraćtubierkulozny dyspansier.
Jak i ŭ vypadku ź Viktaram i Śviatłanaj Daškievičami, tam jaje nie pakłali, bo nie było miescaŭ.
Jaje pieranakiravali, jak i paraj dzion raniej Daškievičaŭ, u skurna-vienierałahičny dyspansier, pieraprafilavany pad raźmiaščeńnie ludziej ź pnieŭmanijami. Jon byŭ taksama pierapoŭnieny. Šastoŭskaja lažała ŭ adnoj pałacie ź jašče šaściu pacyjentami.
U noč na 25 sakavika ŭ Haliny pačaŭsia kašal, uźnikli prablemy z dychańniem. A 26 sakavika pastavili dyjahnaz — dvuchbakovaja pnieŭmanija, jaje pieravieźli ŭ reanimacyju. Viečaram 28 sakavika z balnicy patelefanavali i vykazali spačuvańnie.
Na nastupny dzień pryjšoŭ vynik testu na karanavirus — jon byŭ stanoŭčy, zapeŭnivaje dačka.
U paśviedčańni ab śmierci, jak i ŭ pamierłaha 30 sakavika viciebskaha akciora Viktara Daškieviča, staić kod J18.9 («pnieŭmanija nieŭdakładnienaja»).
«Ja sprosiła v morhie: «A čto vy napišietie v pośmiertnom epikrizie?» — «To, čto i napisano: «pnievmonija nieutočniennaja». — «A to čto połožitielnyj riezultat na koronavirus — s etim kak byť?» — «Nam nikakich rasporiažienij na etot sčiet nie davałoś». Ja nastaivała, čtoby v dokumienty vnieśli i śviedienija pro riezultat tiesta na COVID-19. U mienia sprosili: «Začiem vam eto?» — raskazvaje dačka.
Hanna kaža, što da hetaha času nie vieryć u toje, što adbyłosia: «Mama zhareła litaralna za piać dzion. U paniadziełak syšła ŭ palikliniku na svaich nahach, była ŭ dobrym nastroi, žartavała sa mnoj. A ŭ subotu čałavieka nie stała!»
Kali žančyna tak i nie dačakałasia, kab pra śmierć jaje mamy paviedamili, jana źviarnułasia na Tut.baj, jaki i apublikavaŭ hetuju historyju. (Padrabiaznaści čytajcie TUT.)
Čamu heta važna? Pa-pieršaje, heta pytańnie praŭdy i pavahi da pamiaci čałavieka. Zamoŭčvańnie dyjahnazu pamierłaha ŭ dadzienym vypadku — heta vykarystańnie jaho ŭ cyničnych palityčnych metach palapšeńnia statystyki. Pa-druhoje, heta pahroza žyćciu i zdaroŭju inšych ludziej. Kali achviara karanavirusa nie ŭličvajecca jak takaja, nie pravodzicca nieabchodnaha nazirańnia za kołam jaho kantaktaŭ. Dačka Šastoŭskaj z abureńniem raskazała, što nichto jaje nie izalavaŭ, siamja sama izalavałasia, razumiejučy niebiaśpieku dla inšych ludziej.
U anałahičnaj situacyi apynulisia siemji 58-hadovaj Taćciany Chuziejevaj i 47-hadovaj miedsiastry Śviatłany Kisialovaj. Jany taksama pamierli ad pnieŭmanij i, pieršaja dakładna, a druhaja — imavierna, bo niama nijakaj infarmacyi, nie trapili ŭ statystyku Minzdaroŭja. Trahiedyja jašče i ŭ tym, što ŭ Kisialovaj zastałasia siratoju 7-hadovaja dačka.
Čytajcie taksama: Zhareŭ za piać dzion. U Viciebsku ad karanavirusa pamior 58-hadovy pałkoŭnik prakuratury
Čytajcie taksama: «Bajalisia nieści dadomu svaju formu». Stała bolš viadoma pra 47-hadovuju miedsiastru, jakaja pamierła ŭ Viciebsku
