U Viciebsku raptoŭna pamior 25-hadovy hramadzianin Rasii Daniił Łapaciuk. Uviečary 6 krasavika chłopca pryvieźli ŭ balnicu, unačy jon pamior.
Daniił — uradženiec rasijskaha Omska. U Viciebsku jon žyŭ faktyčna sam. Pracavaŭ to tut, to tam: kiroŭcam taksi, ramontnikam kampjutaraŭ, sprabavaŭ rabić sajty…
Maci i siastra jaho žyvuć u Francyi, baćka chłopca, fatohraf Siarhiej Hałavač, žyvie ŭ Rasii. Mienavita baćka apublikavaŭ emacyjny post u sacsietkach: maŭlaŭ, syn pamior ad pnieŭmanii.
Dakładnaja pryčyna śmierci pakul nieviadomaja. Aficyjnaje zaklučeńnie budzie vydadziena tolki 8 krasavika, kažuć siabry Daniiła.
Baćki Łapaciuka dakładnaj infarmacyi taksama nie majuć — padrabiaznaści paviedamlajuć im viciebskija siabry chłopca.
«U jaho była astma i słabaje zdaroŭje. Mahčyma, jon pamior ad prystupa nabytaha dyjabietu», — razvažaje jaho siastra Sofja.
«Naša Niva» źviazałasia z adnym ź siabroŭ.
«U Daniiła była astma. I raptam jamu stała vielmi kiepska, prosta ŭ adzin momant. My advieźli jaho ŭ balnicu ŭviečary 6 krasavika, — kaža siabar Łapaciuka. — Ale ci to ŭnačy, ci to ranicaj Daniił pamior u reanimacyi. Pnieŭmanija heta była ci karanavirus — kazać rana. Cieła jašče nie addali. Jak i kali jaho budziem chavać, pakul nie vyrašana.
Ale mahu skazać dźvie rečy. Pa-pieršaje, u balnicy ŭ Daniiła znajšli pavyšany ŭzrovień cukru ŭ kryvi. To-bok, faktyčna, dyjabiet, pra jaki jon i sam nie viedaŭ — da daktaroŭ jaho było nie zaciahnuć.
I druhoje. Ja havaryŭ z daktarami, i ŭpeŭnieny, što jany zrabili ŭsio patrebnaje, kab vyratavać Daniiłu žyćcio».
Chavać Daniiła buduć siabry ŭ Viciebsku. Baćki i siastra nie pajeduć u Biełaruś praz zakrytyja miežy.
Tym časam rasijskija telehram-kanały padchapili emacyjny dopis baćki chłopca. Paplečnik rasijskich libieralnych palitykaŭ, eks-žurnalist NTV Anton Krasoŭski napisaŭ u telehramie: maŭlaŭ, kali ŭ Biełarusi zdaryłasia takaja situacyja, to ci pavinna isnavać sama Biełaruś? Heta paviedamleńnie repościać prarasijskija kanały, aryjentavanyja na biełaruskuju aŭdytoryju.
