Heta adbyłosia 16 krasavika ŭ vioscy Rakitna pad Łunincam. Rankam pamior haspadar doma Ivan Vidnikievič, a viečaram — jahonaja žonka Hanna. Jašče na pačatku krasavika adčuŭ niedamahańnie ichni syn Alaksandr, staršynia Dvareckaha sielsavieta. Alaksandru 47 hadoŭ, a žyŭ jon razam z baćkami. Ad 6 krasavika Alaksandr nie chadziŭ na pracu, a 16-ha — jaho špitalizavali z dvuchbakovaj pnieŭmanijaj.
«Zvaniŭ siońnia, kaža, što ŭžo narmalna ŭsio ź im. Pajšoŭ na papraŭku, a tak dniom tempieratura była 37,8, a pad viečar da 39 padymałasia, — raskazvajuć u sielsaviecie. — Pieršy test na karanavirus u jaho stanoŭčy byŭ. Nibyta ŭžo i druhi brali, ale pakul vynikaŭ niama».
U balnicy lažyć i starejšaja dačka Vidnikievičaŭ. Jana taksama žyła ŭ Rakitnie, niedaloka ad chaty baćkoŭ. Što mienavita ź joj, adnaviaskoŭcy nie viedajuć.
U sielsaviecie «Našaj Nivie» taksama raskazali, što ŭ balnicy ź pnieŭmanijaj lažyć i zahadčyca spraŭ, ale ŭ jaje test na COVID-19 nibyta akazaŭsia admoŭny.
Siamja Vidnikievičaŭ žyła ŭ Rakitnie pa vulicy Sadovaj. Jany daŭno piensijaniery: Ivanu Ryhoraviču było 83 hady, a Hańnie Alaksiejeŭnie — 87. U svoj čas pracavali palavodami ŭ kałhasie.
U spadaryni Hanny taksama znajšli pnieŭmaniju, ale jaje nie špitalizoŭvali pa pryčynie taho, što nie było b kamu dahladać jaje muža. Ivan Ryhoravič užo daŭno nie chadziŭ, byŭ prykavany da łožka. Miedyki lekavali žančynu doma.
«Jon rankam pamior. Amal adrazu i jaje ŭ reanimacyju pavieźli, na nasiłkach z chaty vynosili, da viečara pamierła», — kaža susiedka Vidnikievičaŭ.
«U nas u vioscy ŭžo treci raz takoje, što siamja ŭ adzin dzień pamiraje, ale heta jašče da karanavirusa było», — kaža inšy žychar Rakitna.
I syna, i dačku na pachavańnie baćkoŭ nie adpuścili z balnicy. Arhanizoŭvała raźvitańnie jašče adna dačka.
«Pachavańnie 17 krasavika było. Pajechała na mohiłki mašyna z zakrytymi trunami: nichto pobač nie siadzieŭ z trunoj, za mašynaj pieššu taksama nichto nie išoŭ. Ludzi tolki ŭ aŭto jechali śledam, mašyn šeść moža. I paśla abiedu raźvitalnaha nie arhanizoŭvaŭ nichto. Chata ciapier na zamku staić», — kaža susiedka.
Adkul u Rakitnym moh uziacca karanavirus, ludzi nie viedajuć. «Pa ŭsim śviecie toj virus, to čamu ŭ nas nie budzie. Amierykancy kažuć, što kitajcy jaho prydumali, kitajcy — što amierykancy. Ale my nie viedajem, chto jaho siudy pryvioz», — kažuć žychary łuninieckaj viosački.