Finał 11 krasavika, president.gov.by
Chakieist kamandy prezidenta zdaŭ stanoŭčy test na karanavirus. Hetuju infarmacyju dla RIA Naviny paćvierdziła pres-sakratar Alaksandra Łukašenki Natalla Ejsmant.
«Hulec prezidenckaj chakiejnaj kamandy Dźmitryj Mialeška sapraŭdy špitalizavany z dyjahnazam pnieŭmanija. Atrymany stanoŭčy vynik testu na COVID-19», — skazała N. Ejsmant.
Adkazvajučy na pytańnie, ci kantaktavaŭ Łukašenka ź infikavanym hulcom, Ejsmant adkazała admoŭna. «Dźmitryj zachvareŭ prykładna praz tydzień paśla zakančeńnia amatarskaha čempijanatu Biełarusi pa chakiei, kali ŭsia kamanda znachodziłasia ŭ adpačynku», — padkreśliła jana.
Zakranajučy pytańnie, ci zdavaŭ test na karanavirus kiraŭnik Biełarusi, Ejsmant skazała, što ciapier u hetym niama nieabchodnaści. «Prezident nie byŭ i nie budzie sychodzić u izalacyju, addalenku i inšaje», — dadała jana.
Adkazvajučy na pytańnie ab samaadčuvańni kiraŭnika dziaržavy, pres-sakratar skazała: «Nie dačakajeciesia! Jak paćvierdžańnie — hladzicie na pracoŭnyja budni prezidenta, u pryvatnaści, repartažy biełaruskaha telebačańnia ź siońniašniaha naviedvańnia pradpryjemstva ŭ Babrujsku».
Raniej pra karanavirus u Mialeški napisaŭ telehram-kanał NEXTA.
Dźmitryj Mialeška vystupaje za kamandu Łukašenki ŭ amatarskich respublikanskich spabornictvach. Hulaŭ jon i ŭ finalnych matčach, dzie kamanda na čale z Łukašenkam pieramahła kalektyŭ Minskaj vobłaści. Turnir zaviaršyŭsia 11 krasavika.
