Ministerstvu achovy zdaroŭja pieradadali vialikuju partyju srodkaŭ indyvidualnaj abarony dla miedrabotnikaŭ, paviedamlaje pres-słužba viedamstva.
Minski centr raspracoŭki Wargaming biazvypłatna pieradaŭ «Biełmiedtechnicy» Ministerstva achovy zdaroŭja 100 tysiač adnarazovych achoŭnych kambiniezonaŭ. Hetyja srodki indyvidualnaj abarony byli adšytyja pa śpiecyjalnaj zamovie na vytvorčych mahutnaściach kampanii Mark Formelle.
Akramia taho, napiaredadni kampanija Wargaming i Dziciačy fond AAN (JUNISIEF) pieradali ŭ Centr ekstranaha reahavańnia Ministerstva achovy zdaroŭja partyju 91 tys. filtrujučych masak kłasifikacyi FFP3 (vytvorčaść mižnarodnaj karparacyi 3M).
«Hetyja srodki indyvidualnaj abarony zabiaśpiečvajuć najvyšejšuju stupień filtracyi pavietra, a taksama efiektyŭnuju abaronu orhanaŭ dychańnia ad praniknieńnia čaścic. Jany rekamiendavany Suśvietnaj arhanizacyjaj achovy zdaroŭja dla vykarystańnia miedycynskimi rabotnikami pry akazańni dapamohi pacyjentam z COVID-19», — adznačyli ŭ pres-słužbie.
U najbližejšy čas reśpiratary buduć dastaŭleny va ŭstanovy achovy zdaroŭja, jakija ŭ ich najbolš majuć patrebu: 20% — va ŭstanovy achovy zdaroŭja Minska, pa 12,5% — u Minskuju, Homielskuju i Bresckuju vobłaści, pa 10% — u Hrodzienskuju, Mahiloŭskuju, Viciebskuju vobłaści i padviedamasnyja RNPC, a taksama 2,5% u miedustanovy inšych viedamstvaŭ.
Zbor srodkaŭ JUNISIEF u Biełarusi praciahvajecca. Dapamahčy daktaram, jakija pracujuć z pacyjentami COVID-19, možna praz achviaravańnie na sajcie Dziciačaha fonda.
