Uvodzić pahraničny kantrol na ŭnutranaj miažy Sajuznaj dziaržavy nie płanujecca.Pra heta BiełaPAN zajaviŭ načalnik pres‑centra Dziaržaŭnaha pahraničnaha kamiteta Biełarusi Alaksandr Ciščanka, kamientujučy niapravilnuju interpretacyju niekatorymi ŚMI adnoj z tem dakłada 6 krasavika staršyni KDK Zianona Łomacia prezidentu Alaksandru Łukašenku.
«Kiraŭnik dziaržavy prainfarmavany ab situacyi na punktach propusku na biełaruska‑rasijskaj miažy. Kali na źniešniaj miažy Sajuznaj dziaržavy punkty propusku adpaviadajuć mižnarodnym standartam, to na miažy z Rasijaj situacyja patrabuje pryniaćcia nieadkładnych mier. Savietu ministraŭ daručana raspracavać typovyja prajekty abstalavańnia punktaŭ propusku na biełaruska‑rasijskaj miažy», — paviedamiła napiaredadni pres‑słužba prezidenta.
Pavodle słoŭ A.Ciščanki, havorka idzie ab stvareńni ŭ punktach propusku nieabchodnych umoŭ dla vykanańnia, naprykład, mytnych, strachavych zadač, praviadzieńnia transpartnaha i fitasanitarnaha kantrolu. Dla hetaha, a taksama dla zručnaści hramadzian, jakija pierasiakajuć miažu, patrabujecca adpaviednaja infrastruktura, zaznačyŭ pradstaŭnik Dziaržpahrankamiteta. «Zadačy pa ažyćciaŭleńni pahraničnaha kantrolu nie staviacca», — padkreśliŭ jon.
Što da dziejnaści biełaruskich pamiežnikaŭ na pryhraničnych terytoryjach, to, jak zajaviŭ A.Ciščanka, sumiesna z rasijskimi kalehami jany vykonvajuć zadačy pravaachoŭnaj nakiravanaści: baraćba sa złačynnaściu, kantrabandaj, nielehalnaj mihracyjaj i h.d.
