Siońnia ŭ Miensku pačynajucca repetycyi vajskovaha paradu da Dnia niezaležnaści, jaki aficyjna adznačajecca 3 lipienia. Aproč vajennaj i sielhastechniki, pierad ustalavanymi na novym praspekcie Mašerava trybunami projduć fizkulturniki j aktyvisty BRSM, jakija pakažuć teatralizavanaje i spartovaje šoŭ. Upieršyniu ŭ kalonie demanstrantaŭ možna budzie zaŭvažyć maładych maci z vazkami, jakija majuć symbalizavać stabilnuju demahrafičnuju sytuacyju ŭ krainie.
Siońnia ŭviečary na praspekcie Mašerava ŭ Miensku pačynajecca pieršaja ź dźviuch hieneralnych repietycyjaŭ vajskovaha paradu da Dnia niezaležnaści (druhaja zaplanavanaja ŭ noč na 30 červienia). A zaŭtra pad dacham krytaha futbolnaha manežu svaje «prahony» dumajuć naładzić aktyvisty BRSM i mienskija školniki, jakija z dapamohaj balonikaŭ i kavałkaŭ tkaniny buduć składać tematyčnyja kampazycyi – pieradusim, ciapierašnija dziaržaŭnyja symbali.
Samaj vialikaj admietnaściu šeścia maje stać admysłova sfarmavanaja kalona maładych maci ź niemaŭlatami ŭ vazkach. Z takoj inicyjatyvaj vystupiła kiraŭnictva BRSM, i heta znajšło padtrymku ŭ Mienharvykankamie. Jak skazaŭ načalnik upraŭleńnia idealohii vykankamu Hienadź Kurbieka, ciapier šukajuć achvočych prajści z małymi pad hrukat vajskovaha arkiestru.
(Kurbieka: ) «Pytańnie doŭha dyskutavałasia, źjavilisia pytańni – šmat ci minimum vazkoŭ pakinuć. Litaralna siońnia dyskusii praciahvalisia. Kankretna z režyseram vyznačajucca – kolki j čaho».
(Karespandent: ) «Ale prafesijnych aktoraŭ na hetych rolach nia budzie?»
(Kurbieka: ) «Navošta tut aktory? Dy nie, Hod maci, tamu maładyja ludzi – maładyja maci, maładažony. Zaduma takaja. U spartovaj častcy – tak, tam buduć prafesijanały. Budzie Julija Nieściarenka, buduć alimpijskija čempijony, čempijony śvietu iści».
A voś Hanna Maciušenka, maci čatyroch dziaciej, pierakananaja: publična rapartavać pra ščaślivaje žyćcio siemjaŭ, dzie jość małyja dzieci, dačasna.
(Maciušenka: ) «U nas prablemy dosyć hlabalnyja. Pieradusim, u baćkoŭ elementarna niama pracy. Šmatdzietnuju maci nikudy nie biaruć, tamu što hladziać: šmat dziaciej – značyć, heta dapamoha, heta balničnyja i hetak dalej. Naturalna, adrazu idzie admova. Na biržu pracy, kaniečnie, biaruć, ale zabiaśpiečyć pracaj realna nichto nia choča. Zarobak, jaki prynosiać našy taty, – uvohule ślozy. Tamu što košty na charčy daŭno pryroŭnienyja da eŭrapiejskich, a zarobak nierealny, kab prakarmić siamju. Nie havoračy ŭžo pra toje, kab płacić jašče i kamunalnyja pasłuhi».
U časie pracy ŭ administracyi prezydenta Alaksandar Płaskavicki peŭnym čynam mieŭ dačynieńnie da farmavańnia idealohii ŭ dziaržavie. Adnak adznačeńnie pryznačanaha na 3 lipienia Dnia niezaležnaści spadar Płaskavicki nia źviazvaje sa śviatam sapraŭdnaha suverenitetu Biełarusi.
(Płaskavicki: ) «Heta možna nazvać i suverenitetam. I toje, što jaho niejkim čynam Łukašenka abaraniaŭ, – taksama biezumoŭna. Ale ci toj heta suverenitet, pra jaki maryli kaliści? Ja dumaju, što nie. Navat taki prykład: kali niechta ŭ hramadzkim transparcie lamantuje, i ŭsie ad jaho adychodziać ubok, jon u niejkim sensie taksama suverenny. Ale ž suverenitet, kali ciabie nie pavažajuć tyja, chto navokał, a bajacca, – heta nia toj suverenitet, pra jaki maryli».
Ad siońniašniaha dnia idealahičnyja ŭpraŭleńni pa ŭsioj krainie abviaścili pra pačatak akcyi da Dnia niezaležnaści. Prapahandysty zaklikajuć zaviazvać čyrvona-zialonyja stužki na sumkach, na antenach aŭtamabilaŭ, uplatać ich u vałasy i hetym demanstravać padtrymku ciapierašnich uładaŭ. A voś analahičnyja zakliki demakratyčnych siłaŭ, jakija ŭ jakaści atrybutu vykarystoŭvajuć bieł-čyrvona-biełyja stužki, adrazu ž pryraŭnoŭvajucca da administratyŭnaha pravaparušeńnia.
