Jašče adnaho člena inicyjatyŭnaj hrupy Cichanoŭskaj u Hrodnie zatrymali padčas zboru podpisaŭ
Juliju Karnačavu zatrymali 8 červienia prykładna ŭ 16:30, kali jana źbirała na Savieckaj płoščy podpisy za vyłučeńnie Śviatłany Cichanoŭskaj u kandydaty ŭ prezidenty Biełarusi. Pryčynu zatrymańnia supracoŭniki milicyi nie raspaviali, piša Hrodna.life.
Zatrymlivaŭ člena inicyjatyŭnaj hrupy načalnik adździeła słužby prafiłaktyki Leninskaha RAUS Vadzim Nalivajka.
«Padyšoŭ supracoŭnik milicyi, apranuty «pa hramadziancy», pakazaŭ paśviedčańnie i paprasiŭ Juliju prajści ź joj, — raspaviadaje vałancior Pavieł. — Jon byŭ nie adzin i nijakaha supracivu z našaha boku nichto nie akazvaŭ. Julija spytała, čamu jaje zatrymlivajuć. Jon skazaŭ, što rastłumačyć joj potym, pry hetym dadaŭ, što «zakryvać» jaje nie buduć. Nu jak takoje moža być? Mahli pa poźvie vyklikać ranicaj, ale im spatrebiłasia jaje zatrymać, kali jana źbirała podpisy».
Siabry inicyjatyŭnaj hrupy Śviatłany Cichanoŭskaj u Hrodnie adznačajuć, što milicyja akazvaje na ich mocny cisk z pačatku kampanii pa zbory podpisaŭ. U Hrodzienskim rehijonie samaja maleńkaja inicyjatyŭnaja hrupa Cichanoŭskaj — 7 čałaviek. Kaardynatara hrupy Dźmitryja Furmanava zatrymali jašče 29 maja.
Juliju Karnačavu adpuścili ŭ 18:00. Na jaje składzieny pratakoł ab administracyjnym pravaparušeńni za 29 maja pa artykule 17.1 KaAP (Drobnaje chulihanstva, karajecca ad 2 da 30 bazavych vieličyń albo administracyjnym aryštam). Nibyta «žančyna zaminała prajezdu aŭtatranspartu, stukała pa aŭtamabili rukami, chapała za vopratku hramadzian i supracoŭnikaŭ milicyi, sprabavała naŭmysna zadumać bojku». Z pratakołam Karnačava nie zhodnaja. Kali jaje vykličuć u sud, pakul nieviadoma.
Ciapier čytajuć
«Pajšli nach*j vy i vaš «Baćka», pi***asy!» Pjanyja pryhody zrabili armianina Jarvanda palitviaźniem. Ciapier jon zmahajecca z prablemami ŭ Polščy13
Kamientary