12 červienia ŭ Viciebsku pamierła miedsiastra Viciebskaj haradskoj kliničnaj balnicy chutkaj miedycynskaj dapamohi Natalla Ancipava. U jaje byŭ karanavirus. Pra heta TUT.BY raspaviała jaje siastra Taćciana.
Natalla Ancipava pracavała ŭ chirurhičnym adździaleńni.
Žančyna pamierła ŭ piatnicu, 12 červienia. Pryčynaj śmierci ŭ dakumientach, pa słovach jaje siastry Taćciany, značycca vostraja reśpiratornaja niedastatkovaść.
— U jaje była virusnaja pnieŭmanija i karanavirus. Jana pajšła na balničny 29 maja, tamu što drenna adčuła siabie jašče na pracy — napeŭna, heta było 27 maja. Pryjšła z pracy i kaža: niešta mnie niejak drenna, jak pry prastudzie. A ŭ piatnicu [29 maja] u jaje ŭžo była tempieratura da 38 i jana vyklikała lekara. Lekar pryznačyŭ supraćvirusnyja preparaty, antybijotyki doma pić, daŭ balničny i skazaŭ pryjści ŭ aŭtorak na pryjom. Lepš nie rabiłasia — i ŭ sieradu Natašy zrabili test na karanavirus i zdymak. Tam pnieŭmanija. Adrazu dali nakiravańnie ŭ «trestaŭskuju» balnicu [Viciebskaja haradskaja centralnaja kliničnaja balnica], špitalizacyja była ŭ toj ža dzień. 4 červienia jaje ŭžo zabrali ŭ BCHMD. Što vynik testu stanoŭčy, my daviedalisia 5 červienia. Nataša była ŭ reanimacyi na ŠVŁ, a ŭčora pamierła.
Natalli Ancipavaj było 42 hady. Pa słovach siastry, jana žyła razam ź joj i mamaj i prapracavała miedsiastroj kala 15 hadoŭ.
