Majkł Bejkier, fota z asabistaha archiva
Šviedskija ŭłady ździejśnili pamyłku, kali admovilisia ŭvodzić žorstkija abmiežavańni dla baraćby z epidemijaj COVID-19. Pra heta ŭ intervju RBK zajaviŭ navukovy daradca ŭrada Novaj Ziełandyi, prafiesar Majkł Bejkier. Pavodle jaho słoŭ, padychod Šviecyi da baraćby ź virusam zasnoŭvaŭsia na troch niasłušnych hipotezach.
«Pieršaja hipoteza ŭ tym, što navat va ŭmovach raspaŭsiudžvańnia virusa [i adsutnaści maštabnaha łakdaŭna] vy možacie abaranić hramadzian, jakija ŭvachodziać u hrupy ryzyki, ale ŭ šviedaŭ hetaha nie atrymałasia», — adznačyŭ jon. Raniej hałoŭny epidemijołah krainy Anders Tehnieł pryznaŭ, što ŭłady nie zmahli praduchilić źjaŭleńnie asiarodkaŭ zachvorvańnia ŭ damach sastarełych, što zabrała žyćci pažyłych ludziej. Akramia taho, śmiarotnaść ad virusa ŭ Šviecyi vyšejšaja, čym u susiednich Narviehii, Danii i Finlandyi.
Zhodna z druhoj hipotezaj, jakuju vyłučali daradcy šviedskich uładaŭ, nasielnictva krainy zmoža chutka nabyć kalektyŭny imunitet, ukazaŭ Bejkier. «Zrešty, asablivych zruchaŭ tut taksama nie adbyłosia», — skazaŭ jon.
Pavodle statystyki, tolki ŭ Stakholmie na COVID-19 pierachvareli mienš za 10%, a dla vypracoŭki «kalektyŭnaha imunitetu» nieabchodna pieraadoleć paroh u 60% tych, chto zachvareŭ pa ŭsioj krainie.
«Treciaja hipoteza zaklučałasia ŭ tym, što adsutnaść karancinnych mier dazvolić paźbiehnuć ekanamičnych vydatkaŭ, ale i takija nadziei nie apraŭdalisia», — udakładniŭ Bejkier. Jak vynikaje z prahnozaŭ Jeŭrakamisii, VUP Šviecyi pa vynikach 2020 hoda ŭpadzie na 6,1%.
Bejkier adznačyŭ, što asabista znajomy sa šviedskimi ekśpiertami-epidemijołahami i pavažaje ich jak prafiesijanałaŭ. «Na momant pačatku pandemii nichto nie moh skazać napeŭna, jaki šlach pravilny, a jaki nie, i arhumienty šviedskich navukoŭcaŭ mieli pad saboj niekatoruju łohiku. Tym nie mienš varta pryznać, što Šviecyja dapuściła pamyłku», — skazaŭ jon, vykazaŭšy nadzieju, što karaleŭstva adkarektuje svaju stratehiju baraćby ź virusam.
Pa słovach Bejkiera, na pačatkovaj stadyi pandemii niekatoryja navukoŭcy ŭ Novaj Ziełandyi prajaŭlali cikavaść da vopytu Šviecyi, adnak u vyniku miascovyja ŭłady vyrašyli pajści šlacham azijackich dziaržaŭ, jakija apieratyŭna pryniali žorstkija miery dla baraćby z COVID-19.
«Heta dazvoliła nam likvidavać bolšaść łancužkoŭ pieradačy virusa, a taksama pavialičyć abjom testavańnia — až da 5-10 tys. testaŭ u dzień pry nasielnictvie 5 młn čałaviek», — paviedamiŭ jon.
Novaja Ziełandyja ŭžo zmahła padavić usie ahmieni ŭ krainie i źniała ŭsie abmiežavańni, jakija tyčacca sacyjalnaha dystancyjavańnia.
Šviecyja — adna ź niamnohich, chto admoviŭsia ad žorstkich mier izalacyi ŭ adkaz na pandemiju. Navukovy daradca ŭrada krainy Juchan Hizekie śćviardžaŭ u razmovie z RBK, što šviedskaja sistema achovy zdaroŭja spraŭlajecca z napłyvam zaražanych, a žorstkija abmiežavańni nie dapamahli b u doŭhaterminovaj pierśpiektyvie. «Usio, što robić žorstki karancin, — heta adkładaje raźviazańnie prablemy, jakaja pierad vami staić. Ale hetaja prablema pa-raniejšamu zastajecca aktualnaj praz paru miesiacaŭ», — adznačyŭ jon u pačatku maja, vykazaŭšy nadzieju na vypracoŭku ŭ šviedaŭ kalektyŭnaha imunitetu na praciahu niekalkich miesiacaŭ.
Pa stanie na 15 červienia ŭ Šviecyi było 52 383 vypadki zaražeńnia karanavirusam i 4891 śmiarotny vynik, u Novaj Ziełandyi — 1504 i 22 (pa źviestkach Univiersiteta Džonsa Chopkinsa). Nasielnictva Novaj Ziełandyi ŭ dva razy mienšaje, čym Šviecyi.
