Upieršyniu ŭ historyi akcyi pratestu adbylisia ŭ takich małych haradkach, jak Pružany, Stolin i, 20 červienia, u Hancavičach. Pratest ludzi vykazvali vyklučna mirna i pa-jeŭrapiejsku: ludzi vystrailisia ŭ šerah. Reakcyja ŭładaŭ u Hancavičach była źviarynaj. Na ludziej nakinułasia milicyja, zatrymali 12 čałaviek.
Zatrymanych źbivali: pra heta raskazali žurnalisty miascovaha vydańnia «Hancavicki čas», adzin ź jakich sam vyjšaŭ z RAUSa z hiematomaj pad vokam. Kryki inšaha zatrymanaha čuli pad voknami milicyi jaho svajaki.
Vyjšaŭ i kanfuz: mać-pieramać «achoŭnikaŭ pravaparadku» trapiła na videa. My pryncypova nie pierastaŭlajem videa z maciukami, adnak u Jutubie i telehram-kanałach takoha abmiežavańnia niama.
Karystalniki internetu kipiać: viadoma, što doŭhija hady praciŭnikaŭ Alaksandra Łukašenki sotniami zatrymlivali i asudžali pa falšyvych abvinavačvańniach u niecenzurnaj łajancy.
Akcyi pratestu i salidarnaści byli absalutna mirnyja i jeŭrapiejskija. Na fota: Stolin (Bresckaja vobłaść).
«Pahladzicie na maralny ŭzrovień milicyi», «Pa jakim pravie aryštoŭvajuć mirnych ludziej?», «Jak heta dastała» — samyja miakkija z kamientaŭ. U Jutubie masavaść nabyli taksama zakliki da bolš radykalnych mietadaŭ pratestu.
Hancavičy — 14-tysiačny haradok u Bresckaj vobłaści.
Papularnaść Jutuba i telehram-kanałaŭ całkam źmianiła infarmacyjny paradak dnia ŭ krainie. Ułady robić staŭku na raniejšyja represiŭnyja mietady, ale efiekt ad hetaha atrymlivajecca advarotny tamu, jaki byŭ raniej.
Uvohule, «pieradvybarnaja kampanija» ŭ Biełarusi poŭnaja niečakanaściej. Byli aryštavanyja dva samyja papularnyja kankurenty Alaksandra Łukašenki — Siarhiej Cichanoŭski i Viktar Babaryka. Akramia ich, byli aryštavanyja pa kryminalnych spravach i asudžanyja pa administracyjnych bolš za sotniu ich paplečnikaŭ, błohieraŭ i viadomych palitykaŭ. A ŭ apošni dzień zboru podpisaŭ na pikietach u roznych haradach skłali pratakoły na 270 udzielnikaŭ. Učora da ich dadalisia jašče dva dziasiatki.
Naziralniki źviazvajuć takuju represiŭnaść z padzieńniem papularnaści Alaksandra Łukašenki i z tym, što jahonym kankurentam udałosia abjadnać za saboj kaalicyju i prajeŭrapiejskich, i nacyjanalna-demakratyčnych i pa-prarasijsku nastrojenych hramadzian, čaho nie byvała raniej. Ale hałoŭny čyńnik — stomlenaść ludziej 26-hadovym kiravańniem Alaksandra Łukašenki i ekanamičnym zastojem.
Ułady pry hetym demanstrujuć namiery pravieści vybary pa starych schiemach. Jany abvieścili, što ŭ padtrymku vyłučeńnia Alaksandra Łukašenki sabrali rekordnyja 2 miljony podpisaŭ, Centrvybarkam uznačalvaje taja samaja Lidzija Jarmošyna, a naziralnikam, jakija i raniej nie mieli prava praviarać padlik hałasoŭ, zabaranili navat fatahrafavać siabroŭ vybarčych kamisij.
Čytajcie taksama: U apošni dzień zboru podpisaŭ ludzi vyjšli na vulicy ŭ mnohich haradach FOTA. Asabliva horača było ŭ Breście, Maładziečnie i Homieli
«Heta byŭ bajavy pistalet»: MUS patłumačyła, čamu padčas akcyi ŭ Maładziečnie amapaviec vychapiŭ zbroju
Kala Kastryčnickaj płoščy ludzi ŭ cyvilnym zatrymali dvuch chłopcaŭ z «Pahoniaj» na majcy i zaplečniku FOTA
