Afłajn-krama Symbal.by na praśpiekcie Mašerava, 18 z 29 červienia spyniaje svaju pracu, paviedamlaje staronka kramy ŭ fejsbuku.
«Zaprašajem vas da kanca tydnia nabyć u nas što-niebudź, pakul tavary kramy nie aryštavali i nie kanfiskavali. U najaŭnaści jašče šmat ściahoŭ, cišotak, kubkaŭ, paviazak, torbaŭ dy inšaj pradukcyi», — havorycca ŭ paviedamleńni.
Suprać kramy nie spyniajucca pravierki, a tolki pavialičvajucca.
Na minułym tydni na vytvorčaść pryjšła sanstancyja, jakaja vypisała pastanovu ab spynieńni vytvorčaści, i milicyja, jakaja zabrała na pravierku 9 bieł-čyrvona-biełych ściahoŭ.
Taksama praciahvajecca pravierka padatkovaj i ABEZ, da hetaha času niama infarmacyi, na jakoj padstavie kanfiskavanyja ŭ kurjera 419 cišotak z nadpisam «PSICHOZ%».
Užo tydzień ŽREA, ŽEU 2 i ŽKH Savieckaha rajona admaŭlajucca padklučyć elektryčnaść, choć majucca ŭsie damovy.
Na hetym tydni krama dadatkova atrymała list ad Minharvykankama z patrabavańniem prybrać ciaham troch dzion z budynka šyldy kramy, a siońnia, 23 červienia, pryjšoŭ pradstaŭnik MNS raźbiracca pa ananimnaj skarzie: nibyta z pamiaškańnia iduć niepryjemnyja pachi, i žychary skardziacca, što apazicyjnaja krama zajmajecca niezrazumiełaj vytvorčaściu.
«Tamu prosim vas naviedać i padtrymać našu kramu ŭ najbližejšyja dni, pakul nas nie prymusili spynić pracu. Kali vy žyviacie nie ŭ Minsku ci nie ŭ Biełarusi, to praz sajt Symbal.by možna padtrymać nas i apłacić kartkaj stykiery salidarnaści», — havorycca ŭ paviedamleńni.
