Va Ukrainie źjavilisia prykmiety pieraśledu palityčnych apanientaŭ praz sudy. Pra heta havorycca ŭ sumiesnaj zajavie eks-prezidenta Polščy Alaksandra Kvaśnieŭskaha i byłoha śpikiera Jeŭraparłamienta Peta Koksa. Jany ŭ 2012—2014 hadach uznačalvali manitorynhavuju misiju Jeŭraparłamienta pa palityčnych pracesach va Ukrainie, piša bbc.com.
«Kali hety kurs voźmie vierch, demakratyja i pravaparadak va Ukrainie stanuć pieršymi achviarami. Jany źjaŭlajucca klučavymi elemientami supolnych kaštoŭnaściaŭ, jakija znachodziacca ŭ asnovie imknieńnia Ukrainy ŭ ES i NATA», - papiaredžvajuć jany.
Na ich dumku, padziei va Ukrainie śviedčać ab razbureńni standartaŭ i «postmajdanny revizijanizm».
«Nabližeńnie miascovych vybaraŭ dadaje aleju ŭ ahoń našych turbot, kali my stanovimsia śviedkami pieraśledu palityčnych apanientaŭ praź sistemu pravasudździa, a nie skryniu dla hałasavańnia», — havorycca ŭ zajavie Koksa i Kvaśnieŭskaha.
Jany zaklikajuć zmahacca z palityčnymi apanientami na debatach i vybarach, ale nie ŭ sudach.
U intervju BBC ŭ vieraśni 2019 hoda Kvaśnieŭski papiaredziŭ, što reakcyja na palityčny pieraśled Piatra Parašenki ŭ Jeŭropie budzie vostraj.
«Parašenka byŭ partnioram, pavažanym partnioram mnohich lidaraŭ u Jeŭropie, jany nie buduć siadzieć i hladzieć. Kali heta budzie sud, kali buduć dokazy — heta inšaja sprava, ale kali heta robicca z palityčnaj matyvacyjaj, to, viadoma, usie hetyja ludzi buduć hučna pra heta kazać», - adznačyŭ jon.
1 lipienia Piačerski sud Kijeva nie zmoh abrać mieru strymańnia Piatru Parašenku ŭ vyhladzie asabistaha abaviazalnictva źjaŭlacca pa vykliku śledčaha i nie vyjazdžać sa stalicy. Pasiadžeńnie pieranieśli na 8 lipienia.
Prakurory prosiać abaviazać jaho źjaŭlacca na dopyt i ŭ sud, nie vyjazdžać za miežy Kijeva biez dazvołu śledčaha, a taksama zdać zamiežny pašpart.
