Aŭtazaki i zatrymańni na vulicach: hetym adznačyłasia śviata 3 Lipienia ŭ Breście. U akcyi pratestu pryniali ŭdzieł kala 50 čałaviek.
Praciŭniki Łukašenki samaarhanizavalisia ŭ sacyjalnych sietkach i telehram-kanałach, kab sabracca na vulicach i apładziravać. U adznačanyja miescy ŭłady nakiravali aŭtazaki i AMAP.
Ludzi apładzirujuć razam na vulicy Lenina nasuprać budynka KDB:
Zatrymańni adbylisia na vulicy Lenina — ruch pa joj byŭ častkova pierakryty, na vulicy Savieckaj i ŭ haradskim parku.
U sacsietkach kružać videa i fota. Na niekatorych ź ich vidać, jak mužčynu zatrymlivajuć na vačach u žančyny z dačkoj, žančyna saromić milicyjantaŭ:
Ludzi raźbiahajucca pa vulicy Mickieviča:
Kala 18.00 udzielniki akcyi sabralisia kala sceny la teatra estrady ŭ haradskim parku, dzie prachodziŭ śviatočny kancert da Dnia Niezaležnaści, piša Tut.by.
Prykładna ŭ 18.15 AMAP užo zatrymaŭ pieršaha čałavieka. Milicyjanty padyšli da kampanii maładych ludziej, jakija siadzieli na łavačcy kala sceny, vyvieli adnaho z chłopcaŭ i pasadzili jaho ŭ mikraaŭtobus, pryparkavany na vulicy Levanieŭskaha.
Prykładna ŭ 18.45 udzielniki akcyi syšli ad sceny i sabralisia la ŭvachodu ŭ haradski park. Tam jany prastajali da 19.20, a zatym kałonaj pajšli pa vulicy Lenina. U šeści ŭdzielničali kala 50 čałaviek. Ludzi nie vykrykvali łozunhaŭ. Jany išli i plaskali ŭ ładki.
Kałona pierajšła skryžavańnie z vulicaj Mickieviča i pajšła dalej u napramku Hohala. Kala kramy «Vinar» da kałony padjechała niekalki mikraaŭtobusaŭ. Ź ich vybiehli supracoŭniki AMAPu i zatrymali pieciarych čałaviek.
Častka ŭdzielnikaŭ akcyi paśla hetaha pajšła dalej pa vulicy Lenina. Astatnija viarnulisia na vulicu Mickieviča i raśsiejalisia pa dvarach i susiednich vulicach.
Paśla hetaha mikraaŭtobusy AMAPa kružyli pa kvartale, nie dajučy ludziam sabracca ŭ vialikija hrupy.
Pavodle papiaredniaj infarmacyi, za čas akcyi zatrymali šeść čałaviek. Kudy ich dastavili — zaraz udakładniajecca.