Anton Trafimovič
Biełaruskija ŭłady pierad vybarami 9 žniŭnia sprabujuć spynić naša viaščańnie i pieraškodzić aŭdytoryi atrymlivać dostup da nadziejnych navinaŭ, zajaviła vykanaŭca abaviazkaŭ prezydenta «Radyjo Svabodnaja Eŭropa»/»Radyjo Svaboda» Dejzi Syndełar.
Pierad prezydenckimi vybarami 9 žniŭnia ŭłady ŭ Biełarusi zatrymlivali i fizyčna napadali na sotni aktyvistaŭ i žurnalistaŭ, u tym liku na piacioch z «Radyjo Svaboda». Heta adbyłosia ŭ miežach kampanii ahresii z metaj padarvać dziejnaść niezaležnaj presy, havorycca ŭ zajavie karparacyi «Radyjo Svabodnaja Eŭropa»/»Radyjo Svaboda» (RFE/RL).
Samy žorstki napad adbyŭsia 15 lipienia, kali žurnalista Radyjo Svaboda Antona Trafimoviča zatrymali i źbili z udziełam siami supracoŭnikaŭ AMAP, jakija skavali jaho kajdankami i prymusili stajać na kaleniach na padłozie milicejskaj mašyny, sa złamanym nosam dastaviŭšy ŭ milicejski ŭčastak.
Trafimovič, paźniej vyzvaleny biez tłumačeńnia pryčynaŭ zatrymańnia, vioŭ repartaž z centru Miensku z akcyi pratestu suprać admovy Centralnaj vybarčaj kamisijaj rehistravać kandydatami apazycyjaneraŭ Viktara Babaryku i Valera Capkału. Śledčy kamitet Biełarusi zajaviŭ, što budzie raśśledavać akaličnaści zatrymańnia Trafimoviča.
Dniom raniej žurnalistaŭ «Radyjo Svaboda» Alesia Pileckaha i Andreja Rabčyka hvałtoŭna zatrymlivali padčas žyvoj tranślacyi pratestaŭ suprać rašeńnia CVK i niekalki hadzin pratrymali ŭ milicyi.
Paźniej biełaruskaja słužba «Radyjo Svaboda» atrymała z ananimnych krynicaŭ aŭdyjozapisy, jakija dajuć zrazumieć, što za tranślacyjami Svabody viadziecca manitorynh i što za žurnalistami naŭmysna sačyli. Były biełaruski milicyjant praanalizavaŭ zapisy i paćvierdziŭ, što jany sapraŭdnyja.
Vykanaŭca abaviazkaŭ prezydenta «Radyjo Svabodnaja Eŭropa»/»Radyjo Svaboda» Dejzi Syndełar zajaviła z hetaj nahody:
«Jak śviedčać aŭdyjozapisy, heta raźličanyja, uzhodnienyja napady na prafesijnych žurnalistaŭ — žurnalistaŭ, jakich akredytavała Ministerstva zamiežnych spravaŭ Biełarusi».
«Toje, što na našych kalehaŭ napali pasiarod žyvoha efiru, nie pakidaje nijakich sumnievaŭ, što ŭłady sprabujuć spynić našaje viaščańnie i pieraškodzić aŭdytoryi atrymlivać dostup da nadziejnych navinaŭ».
