Sustaršynia Biełaruskaj chryścijanskaj demakratyi Pavał Sieviaryniec znachodzicca bieź pierapynku pad administracyjnym aryštam u mienskim izalatary časovaha ŭtrymańnia na zavułku Akreścina ad 7 červienia, piša «Radyjo Svaboda».
Apošni sud nad palitykam adbyŭsia 8 lipienia, tady jamu prysudzili jašče 15 dzion aryštu, ahułam — nia mienš za 105 dzion. Sieviarynca pryznali palityčnym źniavolenym.
Listoŭ ad Sieviarynca niama
Žonka Paŭła Sieviarynca Volha skazała «Svabodzie», što pieradačy dla jaho na Akreścina ciapier prymajuć, ale listoŭ ad jaho niama, i jana miarkuje, što jamu listy nie dachodziać.
«Na apošnim sudzie praz skajp Pavał paśpieŭ skazać, što listoŭ nie atrymlivaje. Ale heta było tydzień tamu», — zhadała Volha Sieviaryniec.
U presavaj słužbie mienskaj haradzkoj milicyi Volzie Sieviaryniec skazali, što nia viedajuć pra najaŭnaść niekalkich novych pratakołaŭ, nibyta składzienych na Paŭła Sieviarynca.
«Ja abzvaniła niekalki rajonnych sudoŭ, ničoha nia kažuć», — skazała «Svabodzie» Volha Sieviaryniec.
Kazaŭ, jaho chočuć sudzić jašče niekalki razoŭ
«Za čas majho aryštu dvojčy kidali ŭ karcar paśla Paŭła Sieviarynca», — skazaŭ «Svabodzie» miančuk, jaki 16 lipienia vyjšaŭ ź izalatara časovaha ŭtrymańnia na Akreścina paśla administracyjnaha aryštu za ŭdzieł u akcyi pratestu. Jon raskazaŭ «Svabodzie», u jakich umovach ciapier Sieviaryniec.
Sam źniavoleny z Paŭłam Sieviaryncam nie sustreŭsia, ale byŭ u kamery, dzie toj siadzieŭ pamiž pasadkami ŭ karcar. Pra Paŭła Sieviarynca jamu raskazali sukamerniki.
«Kazali, što nastroj u jaho bajavy, nie zdajecca. Da jaho ŭvieś čas prychodziać pravaachoŭniki, nosiać na aznajamleńnie niejkija dakumenty, ale Pavał ich adpraŭlaje dalej i ničoha nie padpisvaje. Kazaŭ, što jaho chočuć sudzić niekalki razoŭ za adno i toje ž», — kaža surazmoŭca «Svabody».
Pavodle źviestak sukamernikaŭ, na jakich spasyłajecca mužčyna, havorka idzie pra pratakoły ab udziele ŭ niesankcyjanavanych masavych akcyjach, składzienych u roznych rajadździełach Miensku.
«Matracaŭ nie dajuć. Kažuć, niama»
«Matracaŭ tam dahetul nie dajuć, — kaža były źniavoleny pra ŭmovy ŭ ahulnaj kamery izalatara časovaha ŭtrymańnia. — Prosta kažuć, što niama. Čuŭ ad chłopcaŭ, što raniej achoŭniki spasyłalisia na adsutnaść matracaŭ, jakija prajšli sanitarnuju apracoŭku, ale ŭ heta ciažka pavieryć, bo matracaŭ niama ni ŭ koha, jak u palityčnych, hetak i ŭ zvyčajnych aryštantaŭ. Tamu ŭsie śpiać na hołych doškach, Pavał taksama, na druhim jarusie. Kazali, što pad hałavu kłaŭ butelku z vadoj.
Darečy, vodapravod tam adklučany, niama ani haračaj vady, ani chałodnaj, ale achoŭniki prynosiać vady, jak tolki paprosiš. Uvohule achoŭniki staviacca narmalna, navat davoli vietliva. Ježa ŭ pieršyja dni majho aryštu była drennaja, ale apošnimi dniami stała narmalnaj, žyć možna. Na prahułku adnaho razu vyvodzili, miarkuju, Paŭła taksama».
«Prosta siadziš na zedliku, čakaješ, kali projdzie čas»
Dvojčy surazmoŭcu «Svabody» źmiaščali ŭ karcar, jak jon śćviardžaje, biez tłumačeńnia pryčyny. Na jaho miesca, kali jon vychodziŭ z karcara, sadžali Paŭła Sieviarynca.
«U karcary dastatkova prachałodna, hradusaŭ 15-17, ale trymacca možna, — kaža jon. — Knih i hazet nie dajuć, prosta siadziš na zedliku, čakaješ, kali projdzie čas. Jak mianie vypuskali, dyk vyhladaje, što tudy znoŭ paviali Sieviarynca, a mianie na jaho miesca ŭ kameru. Taki karahod. Chłopcy kazali, što pryčyn karcaru jamu nie tłumačyli».
Ź IČU na Akreścina surazmoŭca «Svabody» vyzvaliŭsia ŭviečary 16 lipienia. Kaža, što ŭ noč na 15 lipienia ŭ izalatar pastupiła vialikaja hrupa aryštantaŭ za pratesty 14 lipienia na vulicach Miensku. Kolki tady źjaviłasia navičkoŭ?
«Čuŭ razmovy dziažurnych, što čałaviek 60 pryvieźli. Jak raźmiaščali, było šmat hrukatu», — zhadaŭ mužčyna padziei paśla 14 lipienia. Pavodle surazmoŭcy, paboleła aryštantaŭ izalatara na Akreścina i paśla 15 lipienia, ale dakładnaj ličby jon nia viedaje.
