Cichanoŭskaja na mitynhu ŭ Dziaržynsku: Narodu nadakučyła žyć u prynižeńni i strachu FOTA, VIDEA 

Pavialičyć

U Dziaržynsku prachodzić pieršy ahitacyjny pikiet u padtrymku Śviatłany Cichanoŭskaj. Jana prysutničaje tam razam z Maryjaj Kaleśnikavaj i Vieranikaj Capkałaj, piša radyjo «Svaboda».

Na placoŭcy dla ahitacyi kandydatku i pradstaŭnikoŭ štaboŭ Babaryki i Capkały čakali sotni ludziej. «Trojcu» sustrakali pieśniaj «Stieny ruchnut».

U svaim vystupie Śviatłana Cichanoŭskaja zaznačyła, što ŭłady nie zarehistravali Viktara Babaryku i Valera Capkału, bo spałochalisia.

«Jany ŭbačyli pahrozu dla ŭłady, ale jany nie zrazumieli, što pahroza nie ŭ kandydatach, a ŭ samim narodzie, jakomu nadakučyła žyć u prynižeńni i strachu», — vykazałasia kandydat u prezydenty. Śviatłana zaŭvažyła, što jaje muž — viadomy błohier Siarhiej Cichanoŭski, «razbudziŭ biełarusaŭ, jakija ŭžo nia viernucca ŭ zručny dla ŭłady śpiačy stan».

Jana raspaviała, što Siarhiej Cichanoŭski ŭ svaich pajezdkach pa Biełarusi daviedaŭsia ad ludziej pra ich «niaprostaje žyćcio, karupcyju, biaspraŭnyja sudy». «Im chaciełasia ludźmi zvacca, i Siarhiej staŭ nadziejaj na pieramieny dla mnohich, nadziejaj na novuju Biełaruś — svabodnuju i zamožnuju krainu».

«Ułada spałochałasia praŭdy, pačalisia zatrymańni, represii, zapałochvańni. Siarhieja pasadzili ŭ turmu. U našaj siamji adzin za ŭsich i ŭsie za adnaho, i tamu ja pryniała rašeńnie padtrymać Siarhieja i zarehistravacca zamiest jaho. Heta byŭ niaprosty krok, ale kali padčas zboru podpisaŭ ja ŭbačyła šmatlikija čerhi, heta dało mnie šmat siłaŭ. I ja vyrašyła, niahledziačy ni na što, iści dalej, i tolki napierad. Bo ja adčuła adkaznaść za ŭsich tych ludziej, jakija, jak i Siarhiej, chočuć pieramien», — raskazała Śviatłana Cichanoŭskaja.

Maryja Kaleśnikava: «Nie bojciesia aŭtazaku. Heta prosta mašyna»

Na pikiecie ŭ Dziaržynsku vystupiła Maryja Kaleśnikava — pradstaŭnica štabu Viktara Babaryki. Jana nahadała, što sapraŭdnaja siła i ŭłada — u rukach narodu. Prysutnyja pačali skandavać: «Pieramožam!».

Pradstaŭnica štabu zaŭvažyła, što za apošnija dva miesiacy nichto nie paznaje Biełaruś, bo jana źmianiłasia, pračnułasia. «Užo nie čuvać takich frazaŭ, što «ničoha nia źmienicca», my možam źmianić! My stamilisia ad hetaha verchału, padmanu, hetaha dranduletu, jaki razvalvajecca, my razzłavalisia kančatkova!», — vykazałasia Maryja Kaleśnikava.

Jana padkreśliła, što ciapier fiksujecca kožnaja adpiska ad čynoŭnikaŭ, kožny padman i falsyfikacyi. «Čynoŭniki, sudździ ciapier pakidać ślady, jak nikoli raniej. My praciahvajem pakazvać svaju niazhodu. My, hramadzianie, žyviom pa zakonie, a ŭłada — pa hvałcie. Nie bojciesia aŭtazaku — heta prosta mašyna. AMAP — heta ŭsiaho tolki ludzi», — vykazałasia pradstaŭnica štabu.

Jana zaznačyła, što ciapier treba zrabić vybar: siadzieć doma pierad televizaram i «Słavianskim bazaram», — «pravodziačy našu apošniuju nadzieju na svabodu», ci iści napierad, «vykładacca, zmahacca i vykanać maru apošnich dvuch dziasiatkaŭ hadoŭ».

Vieranika Capkała zaklikała prychilnikaŭ pieramien prychodzić na vybary ź biełym branzaletam na ruce

Vieranika Capkała raspaviała na pikiecie pra roznyja inicyjatyvy, jakija pieraškodziać uładzie sfalsyfikavać vybary. Naprykład — bieły branzalet. «Bieły — heta koler žyćcia, svabody, niečaha novaha. Chto budzie ź biełym branzaletam — heta značyć, toj suprać ułady», — patłumačyła Vieranika Capkała.

Jana zaklikała ludziej iści na vybary 9 žniŭnia i hałasavać za Śviatłanu Cichanoŭskuju, a taksama pryniać aktyŭny ŭdzieł u nazirańni. «Čym bolš budzie nas, narodu, tym ciažej uładzie budzie zrabić falsyfikacyju.

Treba, kab nas było bolš na ŭčastkach, čym ich, i kab im ciažej było zrabić falsyfikacyju. Udzielničajcie ŭ inicyjatyvie «Sumlennyja ludzi». My zapuścili inicyjatyvu «Chakaton». I ciapier bolš za 200 hramadzian, talenavitaja moładź, udzielničajuć u chakatonie, pracujuć nad tym IT-rašeńniem, jakoje dapamoža nie sfalsyfikavać vybary», — raspaviała Vieranika Capkała.

Biełyja stužki na rukach, onłajn hałasavańnie i fota ź biuleteniem. Jak zmahacca z falsyfikacyjami

Pradstaŭnik platformy nazirańnia «Sumlennyja ludzi», nakiravanaj na praviadzieńnie svabodnych i spraviadlivych vybaraŭ, Illa raspavioŭ pra kampaniju i niekatoryja prapanovy naziralnikaŭ, što rabić, kab paźbiehnuć falsyfikacyj na vybarach:

• Hałasavać tolki ŭ asnoŭny dzień vybaraŭ, 9 žniŭnia, u druhoj pałovie dnia, bo kali niechta pryjdzie i pabačyć svajo proźvišča ŭ žurnale tych, chto ŭžo pra hałasavaŭ, «kamuści daviadziecca za heta adkazvać». Daterminovaje hałasavańnie — «samaje vialikaje pole dla falsyfikacyj».
• U dzień vybaraŭ prychodzić na vybarčy ŭčastak ź biełaj stužkaj ci biełym branzaletam na ruce, kab naziralniki mahli pabačyć i padličyć tych, što vystupaje za sumlennyja vybary.
• Hałasavańnie onłajn: 22 lipienia na sajcie «Sumlennych ludziej» pavinien źjavicca servis, jaki dazvolić usim žadajučym prahałasavać onłajn, a ŭ dzień vybaru — možna budzie sfatahrafavacca ź biułeteniem i taksama dasłać na hety servis.
• Iści ŭ naziralniki: pradstaŭnik kampanii zaklikaŭ usich iści ŭ naziralniki za vybarami.

• 0
• 0
• 0
• 0
• 0
• 0
• 0
• 0