Cichanoŭskaja na radyjo: Niaŭžo prezident raźličvaje, što, źbivajučy ludziej, kidajučy za kraty, vypisvajučy štrafy, možna prymusić siabie lubić?

Siońnia Śviatłana Cichanoŭskaja źviarnułasia da vybarščykaŭ na Pieršym kanale Biełaruskaha radyjo.

«Mianie nie pryciahvała ideja budavać karjeru palityka, mnie 37 hadoŭ, u mianie dvoje dziaciej, — skazała Śviatłana. - Ale hod tamu Siarhiej Cichanoŭski stvaryŭ prajekt «Kraina dla žyćcia», jeździŭ pa krainie, ludzi stali raskazvać, čamu im kiepska žyć. I ich stali kidać u turmy. I kali Siarhieja pazbavili mahčymaści być kandydatam, ja vyrašyła iści ŭ prezidenty. Žonka pavinna być za muža. Nichto nie spynić žančynu, jakaja abaronić svaju siamju, jak i nichto nie spynić narod, jaki abaraniaje siabie».

«Ja ničoha nie budu abiacać, jość inšyja ludzi. Jany 26 hod abiacajuć — hodnaja piensija, zarobak pa 500 — i ničoha nie robiać».

Mnie nie padabajecca, što ludziam niama za što žyć, što jany ciahnuć ad zarobku da zarobku, što vymirajuć vioski, u maleńkich haradach zastajucca adny piensijaniery, ludzi pamirajuć ad karanavirusa, a ŭłada chavaje realnyja ličby, čynoŭniki budujuć vialikija damy i jeździać na kurorty pakul my ledź dažyvajem da zarobku», — kaža Cichanoŭskaja.

Nas pałochajuć biznesmienami, ale samyja bahatyja — čynoŭniki, adznačyła jana.

Ja chaču, kab našy dzieci mieli dobraje žyćcio, kab jany mieli prava vybaru, ja chaču, kab našu krainu pavažali ŭ śviecie, kab my šukali siabroŭ, a nie vorahaŭ, kab ludziej nie chapali na vulicach. Hetym letam ludziej stali chapać za toje, što jany stajali ŭ čerhach, a potym tych, chto padavaŭ skarhi na nierehistracyju. Heta aburalna. Niaŭžo dziejny prezident raźličvaje, što, źbivajučy ludziej, kidajučy za kraty, vypisvajučy štrafy, možna prymusić siabie lubić? Jon što, sapraŭdy dumaje, što hvałtam, chamstvam i chłuśnioj možna vyrašyć prablemy ŭ ekanomicy, da jakich jon sam ža i pryvioŭ krainu?», — zajaviła Cichanoŭskaja.

Niaŭžo ŭłada raźličvaje, što, kidajučy ludziej za kraty, prymusić siabie lubić? — rytaryčna pytaje Cichanoŭskaja. — Niaŭžo nachrapam, chamstvam źbirajecca vyrašyć prablemy ŭ ekanomicy?

«Nie prezident pavinien nam ukazvać, jak nam žyć i što rabić. Prezident, deputaty - usiaho tolki našy pradstaŭniki, heta my pavinny ich kantralavać. Hałoŭnaja naša zadača — dabicca, kab u krainie tak i było», — kaža jana.

«Hałoŭnaja maja zadača — viarnuć ludziam prava hołasu. My pavinny abirać i deputataŭ, i prezidenta. Ja pryjšła ŭ palityku, kab pravieści sumlennyja sapraŭdnyja vybary. Hałasujučy za mianie, vy hałasujecie za prava viarnuć sumlennyja vybary.

«Čynoŭniki nie žadajuć nas słuchać, bo my ich nie vybirajem, ich pryznačaje najvyšejšy čynoŭnik», — patłumačyła jana. 

Jana zaklikała ni ŭ jakim razie nie ŭdzielničać u daterminovym hałasavańni, a pryjści na vybary 9 žniŭnia i «prahałasavać za mianie, Śviatłanu Cichanoŭskuju».

Cichanoŭskaja skazała pra nierehistracyju Babaryki i Capkały. Adnaho pasadzili, a ŭ druhoha vykinuli hałasy ŭ śmietnicu.

Paśla pieramohi Cichanoŭskaja źbirajecca pryniać miery dla zachavańnia stabilnaści ŭ krainie i vydać zahad pra novyja sumlennyja vybary. Źmienicca skład Centravybarkama, na kožnym učastku buduć prazrystyja urny, anłajn-tranślacyja. Pradstaŭniki luboha kandydata zmohuć patrabavać pieraliku hałasoŭ. Daterminovaje hałasavańnie zastaniecca tolki ŭ vyklučnych vypadkach. 

Usie kandydaty atrymajuć roŭnyja mahčymaści dla ahitacyi.

U pierachodny pieryjad, adznačyła jana, krainaj buduć kiravać tyja ž čynoŭniki, što i ciapier, za vyklučeńniem tych, chto hruba parušaŭ zakon.

Adnačasova z novymi vybarami jana płanuje pravieści refierendum pa viartańni da Kanstytucyi 1994 hoda, jakaja skaračaje paŭnamoctvy prezidenta.

Spravy palitźniavolenych buduć spynienyja, projdzie amnistyja pa lohkich złačynstvach i dla «dziaciej 328», buduć kampiensavanyja «palityčnyja» štrafy, pryznačanyja novy hienprakuror i staršynia Viarchoŭnaha suda — tak Cichanoŭskaja adznačyła źmieny ŭ pravavoj śfiery.

Cichanoŭskaja niekalki razoŭ paŭtaryła, što kraina pavinna naležać ludziam, a milicyja pavinna baranić narod, a nie chapać ich na vulicach.

Kab azdaravić ekanomiku, jana źbirajecca źniać barjery dla małoha i siaredniaha biznesu — «chaj ludzi sami stvarajuć pracoŭnyja miescy». Prybytkovyja pradpryjemstvy buduć pracavać, ź nieprybytkovymi buduć «raźbiracca prafiesijanały».

Cichanoŭskaja skazała, što źviernie ŭvahu na daktaroŭ, bo jany pracujuć dla nas. 

«Nastaŭnikaŭ treba vyzvalić ad usiaho, što nie źviazana z navučańniem dziaciej». I jany buduć atrymlivać dastojna. Univiersitety buduć samastojnyja. Ja admianiu zakon Raŭkova (kali zabirajuć u vojska, nie daŭšy praciahnuć adukacyju)».

Kazała kandydat i pra zamiežnuju palityku: «Niezaležnaść — naša absalutnaja kaštoŭnaść, i my jaje nie pradajom. Nam treba stvaryć partniorstva na roŭnych i nie zaležać ad naftavaj i hazavaj ihołki».

«Ja lublu svajho muža, tamu praciahnuła jaho spravu, lublu dziaciej, chaču, kab jany raśli ŭ krainie, dzie ludziam nie zatykajuć irty, lublu biełarusaŭ, chaču dać im prava vybirać» — adznačyła Cichanoŭskaja.

Zaŭtra Śviatłana vystupić na telekanale «Biełaruś-1» (17.00). 

• 0
• 0
• 0
• 0
• 0
• 0
• 0
• 0