Hety dysk adčyniaje dźviery ŭ tajamničy śviet ajčynnaha muzyčnaha siniematohrafu. «Klip‑marafon» — pieršaje takoha kštałtu vydańnie ŭ Biełarusi.
Zasnavalniki padyšli da spravy zvyšadkazna: na dysk trapiła najlepšaje biełaruskaje (biełaruskamoŭnaje!) muzyčnaje videa za apošnija dvaccać hadoŭ — usiaho 43 videatreki.
Klipy ŭmoŭna možna padzialić na try hrupy:
histaryčnaje videa kanca 80‑ch, hetkija mini‑dakumientalnyja filmy («Rej», «Bonda»); videa časoŭ «Klip‑abojmy», kali klipy N.R.M, «Novaha nieba» dy «Niejradziubiela» zdymalisia ledź nie štomiesiac; akuratnyja, ale ad taho maładušeŭnyja muzyčnyja karcinki, źniatyja ŭ apošnija hady dla telekanału «Biełsat».
Za vyniatkam šerahu nu zusim užo prachadnych (tak skažam — zvyšmałabiudžetnych) klipaŭ «Charli» ci «Rostry», uražańnie biełaruskaje videa stvaraje pazityŭnaje. Najpierš za košt biezhrašovaj kreatyŭnaści (hladzim «Ura» ci «Nadzieńku»), najaŭnaści niervu («Cepieliny», «Chramy padajuć») ci prosta dobraha mastackaha hustu («Try Janhały», «Absent»).
Zabaŭna pahladzieć klipy polskich režysioraŭ, źniatych dla «Biełsatu». Štučnaść kantekstu adčuvajecca, ale taja ekzatyčnaść dadaje karcincy vostraha smaku.
Chto b ź biełaruskich režysioraŭ dadumaŭsia dla klipu «Kramy» źniać epizod, dzie dźvie panienki absmoktvajuć adzin jabłyk?Na dysku jość i absalutny rarytet — klip na «Homielski vals» u vykanańni muzykaŭ «Kramy», «Pałacu» i Anatola Jarmolenki z «Siabroŭ», źniaty Jahoram Chrustalovym da 10‑hodździa Čarnobylskaj katastrofy. Na BT toj klip daŭno ŭžo byŭ źniščany, ale zachavaŭsia ŭ pryvatnych archivach.
