20 kastryčnika studenty BrDTU vyjšli na akcyju salidarnaści ź ciapier užo byłym rektaram Alaksandram Drahanam, paviedamlaje «Bresckaja hazieta» ŭ svaim telehram-kanale.
Studenty sabralisia pierad uvachodam u hałoŭny korpus VNU na vialikim pierapynku ŭ 12.50.
Akcyja praciahvałasia paŭhadziny i na piku, pa padlikach žurnalistaŭ, naličvała kala 150 čałaviek. Pierad tym jak razyścisia, jaje ŭdzielniki piać chvilin apładziravali.
«My chočam, kab nas zaŭvažyła administracyja», — skazała adna ź dziaŭčat.
Nahadajem, siońnia, 20 kastryčnika, Alaksandr Łukašenka pryznačyŭ novych rektaraŭ troch biełaruskich VNU: BDUK, MDŁU, BrDTU. Kiraŭnikom Bresckaha techničnaha ŭniviersiteta pryznačany Alaksandr Bachanovič.
Ciapier užo były kiraŭnik univiersiteta Alaksandr Drahan zajmaŭ hetuju pasadu z maja 2018 hoda. 7 vieraśnia kala ŭvachodu va ŭniviersitet prajšła akcyja salidarnaści z zatrymanymi na pratestach studentami, jakaja sabrała kala 50 navučencaŭ VNU. U toj dzień da ich vyjšaŭ Alaksandr Drahan i paviedamiŭ ab vyzvaleńni zatrymanych. Paśla hetaha studenty viarnulisia na zaniatki.
