Žančyna ŭ Viciebsku atrymała štraf za mitynhi ŭ dva razy bolšy, čym jaje zarobak
Sud Kastryčnickaha rajona Viciebska 21 kastryčnika pakaraŭ štrafam u 24 bazavyja vieličyni (648 rubloŭ) Natallu Pierunovu. Jaje pryznali vinavataj va ŭdziele «ŭ niesankcyjanavanych vuličnych šeściach» 6 i 23 vieraśnia. Žančyna pracuje na pradpryjemstvie «Viciebskabłsajuzdruk», pradaje haziety ŭ šapiku, jaje zarobak u dva razy mienšy za prysudžany štraf, piša «Viciebskaja viasna».
Spravu Natalli Pierunovaj razhladaŭ sudździa Uładzimir Carykaŭ. Žančyna nie pryznała svajoj viny ŭ abodvuch epizodach. Na sudzie zajaviła, što siarod pratestoŭcaŭ 23 vieraśnia jaje naohuł nie było.
Na druhoje pa liku pasiadžeńnie ŭ jakaści śviedki byŭ vyklikany supracoŭnik Kastryčnickaha RAUS Vital Pralič, jaki składaŭ na viciablanku pratakoł. Milicyjant mieŭsia davieści, što žančyna, jakaja fihuruje na apieratyŭnych videazdymkach, i jość abvinavačanaja Natalla Pierunova. U jakaści dadatkovaha dokazu Pralič prynios u sud videazapis kamiery nazirańnia, ustalavanaj u Kastryčnickim RAUS. Patłumačyŭ, što Natalla na videa ŭ toj ža majcy, u jakoj była na akcyi 23 vieraśnia.
Paśla prahladu sudździa Uładzimir Carykaŭ pryjšoŭ da vysnovy, što na abodvuch videa fihuruje adna i taja ž asoba. Jon pryznaŭ Natallu Pierunovu vinavataj u pravaparušeńni pavodle art. 23.34 KaAP i pastanaviŭ pakarać jaje štrafam u pamiery 24 bazavyja vieličyni (648 rubloŭ).
Pa słovach Natalli Pierunovaj suma prysudžanaha joj štrafu ŭdvaja bolšaja za jejny zarobak. Žančyna pracuje ŭ šapiku «Viciebskabłsajuzdruka», jaje zarobak, u lepšym razie, składaje 350 rubloŭ.
Kamientary