Pravaabaroncy: Da śmierci Bandarenki, vierahodna, datyčnyja supracoŭniki śpiecpadraździaleńniaŭ MUS
Biełaruskija pravaabarončyja arhanizacyi vystupili z sumiesnaj zajavaj pa fakcie śmierci Ramana Bandarenki.
Šmatlikija videazapisy, śviedčańni vidavočcaŭ dazvalajuć zrabić vysnovu ab tym, što da złačynstva z vysokaj stupieńniu vierahodnaści datyčnyja supracoŭniki śpiecyjalnych padraździaleńniaŭ MUS Biełarusi. Pra heta śviedčyć, u pryvatnaści, meta ich dziejańniaŭ — zryvańnie pratestnaj simvoliki, charakternaja dla pradstaŭnikoŭ siłavych struktur ekipiroŭka, prafiesijnyja i skaardynavanyja dziejańni napadnikaŭ pa zatrymańni i pieramiaščeńni Ramana ŭ mikraaŭtobus, jaki, jak miarkujecca, naležyć adnamu ź śpiecpadraździaleńniaŭ milicyi, a taksama dastaŭleńnie jaho paśla niepasrednaha zatrymańnia ŭ Centralnaje RUUS h. Minsk. Niepryniaćcie nieadkładnych, praduhledžanych pracesualnym zakonam mier dla rasśledavańnia dadzienaha złačynstva, źjaŭlajecca dadatkovym śviedčańniem dačynieńnia ŭłady da jaho ździajśnieńnia.
My źviartajem uvahu na toje, što da vykliku chutkaj Raman na praciahu kala 2 hadzin znachodziŭsia ŭ budynku Centralnaha RUUS h. Minska, h. zn. pad poŭnym kantrolem milicyi. U suviazi z hetym patrabuje abjektyŭnaj pravierki zakonnaść dziejańniaŭ supracoŭnikaŭ milicyi, jakija, vidavočna, nie pryniali miery pa zabieśpiačeńni źbitaha čałavieka terminovaj miedycynskaj dapamohaj.
Pa fakcie śmierci Ramana Bandarenki my patrabujem ad Śledčaha kamiteta i Hienieralnaj prakuratury ŭzbudžeńnia kryminalnaj spravy, a ad orhanaŭ unutranych spraŭ — nieadkładnaha ŭstanaŭleńnia i vyšuku asob, datyčnych da złačynstva.
Kamientary