«Hałavu nachilili da ŭnitaza i niekalki razoŭ nacisnuli na spusk». Zatrymany raspavioŭ pra ździeki ŭ Frunzienskim RUUS
15 listapada pad ścienami Frunzienskaha RUUS u Minsku vałanciory pačuli kryki. «Naša Niva» pahutaryła z zatrymanymi, jakija byli tam u toj dzień. Bolšaść kazała pra karektnaje staŭleńnie z boku milicyjantaŭ, ale dvoje zhadali dziŭnuju historyju. Nibyta mužčynu, jaki spračaŭsia z supracoŭnikam, adviali ŭ prybiralniu, bili i akunali hałavoj va ŭnitaz.
Čytajcie: Što adbyvałasia ŭ Frunzienskim RUUS, pad ścienami jakoha ŭ niadzielu čuli kryki?
Paśla publikacyi z Redakcyjaj źviazaŭsia čałaviek, jaki pabyvaŭ u Frunzienskim RUUS raniej. Jon śćviardžaje, što padobnaja historaja adbyłasia nie ŭpieršyniu.
Mužčynu, jaki napisaŭ nam (jaho imia viadoma Redakcyi), zatrymali 1 listapada. U adździaleńni ludzi tady taksama siadzieli ŭ aktavaj zale, a paśla zapaŭnieńnia dakumientaŭ ich pieravodzili ŭ kamiery na pieršym paviersie.
«Kali na mianie składali pratakoł, vielmi blizka stajaŭ adzin supracoŭnik, i ja padniaŭ na jaho hałavu. Jon skazaŭ tady niešta nakštałt: «Čaho piališsia?» A kali mianie ŭžo vyvodzili ŭ kamieru, jon siadzieŭ na prystupkach da sceny i pieramoviŭsia ź inšym milicyjantam: «Davaj jašče hetaha».
Jany pajšli śledam. Kali pa leśvicy spuskalisia, adzin ź ich mnie ruku na plačo pakłaŭ, skazaŭ, što treba pahutaryć. Ja spačatku padumaŭ, što, mahčyma, jany buduć raskručvać raskajacca na videa. U toj dzień u Frunzienskim RUUSie prapanoŭvali: zdymieciesia — i vam daduć štraf i adpuściać.
Na šlachu da kamier na pieršym paviersie jość prybiralnia. Jany zaviali mianie tudy, źniali ź mianie masku, prymusili stać na kaleni pierad unitazam, nachilili hałavu i niekalki razoŭ naciskali na spusk. Abražali, ale asabliva nie źbivali», — raskazaŭ mužčyna.
Surazmoŭca miarkuje, što asablivaje staŭleńnie da jaho mahło być praz doŭhija vałasy ci biełaruskuju movu.
U kamiery ź im byŭ chłopiec, jakoha taksama klikali «na razmovu». «Jon nibyta zadziraŭsia, kali składali pratakoł, niejkija pytańni zadavaŭ. Chłopiec raskazaŭ, što jaho zavodzili ŭ prybiralniu, apuskali hałavoj va ŭnitaz, źbivali, raspylili bałončyk u štany».
Ci budzie surazmoŭca padavać zajavu na dziejańni milicyjantaŭ, jon jašče nie vyrašyŭ.
«Naša Niva» paprasiła prakamientavać hetyja vypadki deputata Aleha Hajdukieviča, jaki ŭ svoj čas uznačalvaŭ Frunzienskaje RUUS.
«Ja ŭ heta nie mahu pavieryć! Maja pazicyja z 9 žniŭnia: nijaki hvałt nidzie nie dapuščalny. Tamu treba pa kožnym fakcie pisać zajavu i indyvidualna raźbiracca. I ŭ hetym musić być zacikaŭlena ŭ pieršuju čarhu dziaržava, kab da jaje byŭ davier.
Dla mianie heta dzika ŭjavić: jak u prybiralni?.. Bo pamiataju, što navat pry mnie — nie ŭ mianie ŭ kalektyvie — za vypadki pieravyšeńnia paŭnamoctvaŭ pry zatrymańni zavodzilisia spravy», — vykazaŭsia Aleh Hajdukievič.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?1
Kamientary