Mikoła Statkievič,fota Radyjo Svaboda
21 červienia projdzie Kanhres prajeŭrapiejskich siłaŭ. Hałoŭny punkt paradku dnia — vyłučeńnie adzinaha kandydata na nastupnyja prezidenckija vybary. Milinkievič brać udziełu ŭ hetym Kanhresie nie źbirajecca.
Pra toje, što rychtujecca Kanhres prajeŭrapiejskich siłaŭ stała viadoma jašče ŭ lutym. Bolšaściu subjektaŭ demakratyčnaj apazicyi, aproč PKB i BSDP, była ŭtvoranaja admysłovaja kamisija, jakaja štočaćvier źbirałasia na Siadzibie Partyi BNF i viała pieramovy ab padrychtoŭcy mierapryjemstva.
Inicyjataram praviadzieńnia Kanhresu byŭ lider niezarehistravanaj BSDP «Narodnaja hramada» Mikoła Statkievič. A mierkavanyja terminy nazyvalisia — vierasień ci kastryčnik.
Supiarečnaści pry padrychtoŭcy byli. Pieršyja vystupali za vyłučeńnie na Kanhresie adzinaha kandydata ad prajeŭrapiejskich sił. Inšyja vystupali za praviadzieńnie takoj voś mabilizujučaj sustrečy, kab syścisia ŭ ahulnych acenkach i padychodach.
A litaralna paru dzion źjaviłasia infarmacyja, što
lider Ruchu za Svabodu Alaksandr Milinkievič uziaŭ u svaje ruki inicyjatyvu pa praviadzieńni voś takoj sustrečy.Rehijanalnym aktyvistam pajšli listy ad imia eks‑kandydata na pasady prezidenta z zaprašeńniem uziać udzieł u Kanhresie. Siabry astatnich palityčnych partyj i arhanizacyj pra takija pačynańni ničoha nie viedali.
Mikoła Statkievič na heta ŭsio admoŭčvaŭsia. Prasiŭ žurnalistaŭ patelefanavać jamu 21 traŭnia, kali pavinna była adbycca čarhovaja narada pa praviadzieńni Kanhresu. Maŭlaŭ, tady ŭsio i vyrašycca. Čakajcie navin.
Vyrašyłasia. Ad namieśnika staršyni Ruchu za Svabodu Viktara Karniajenki
stała viadoma, što Kanhres adbudziecca roŭna praź miesiac 21 červienia.«Chutčej za ŭsio, brać udzieł nie budziem», — skazaŭ V.Karniajenka. A potym dadaŭ, što ŭsio treba paraicca ź ludźmi z Ruchu, i zrabiŭ ukoł na adras niekatorych palityčnych lideraŭ. «Na ščaście, nam jość z kim raicca, a to šmat takich palitykaŭ, što sami sabie i partyja, i aktyvisty», — iranizavaŭ V.Karniajenka.
Ruch za Svabodu maje namier i praviadzie svoj Kanhres u kastryčniku, zapeŭniŭ namieśnik Milinkievič.
Statkievič ža vypramieńvaŭ aptymist. «Jość ćviordaja damoŭlenaść, što Kanhres adbudziecca 21 červienia», — adrazu skazaŭ jon.
Lider daŭno niezarehistravanaj «Narodnaj hramady» raskazaŭ, što nijakich admysłovych schodaŭ pa vyłučeńni kandydataŭ u rehijonach nie budzie. Kožnaja partyja pryviadzie stolki ludziej, kolki zmoža, zapeŭniŭ Statkievič. Uźnikaje łahičnaje pytańnie, ci nie budzie pry takim raskładzie siarod udzielnikaŭ Kanhresu absalutna vypadkovych ludziej.
Hałoŭnym punktam prahramy budzie vyłučeńnie adzinaha kandydata na pasadu prezidenta ad praŭrapiejskaj kaalicyi.
«Pieramoža toj, chto zmoža zaanhažavać najbolšuju kolkaść svaich prychilnikaŭ. Nie razumieju, čaho chvalavacca lideram, jakija zajaŭlajuć pra ŭłasnuju šmattysiačnuju padtrymku?», — zadajecca pytańniem były palitviazień.
Cikaŭlusia, dziela čaho takaja terminovaść, ci možna pravieści jakasnaje mierapryjemstva majučy ŭsiaho miesiac na padrychtoŭku. «A čaho čakać? My viali kansultacyi ciaham troch miesiacaŭ. Pa asnoŭnych punktach jość damoŭlenaść siami z vaśmi subjektaŭ, jakija viali pieramovy pa padrychtoŭcy Kanhresu», — kaža M.Statkievič.
Praŭda, užo praź niekalki chvilin hutarki vyśviatlajecca, što AHP i BCHD (ci nie samyja masavyja siły, što mohuć uziać udzieł u Kanhresie) kančatkovaha rašeńnia jašče nie pryniali.
Nabiraju numar lidera AHP Anatola Labiedźki. «Viedajecie, ja ŭžo zabłytaŭsia va ŭsich hetych kanhresach. Dla AHP na siońniašni dzień niama bolš aktualnaj zadačy, jak daniasieńnia da ludziej Antykryzisnaj płatformy ADS, čym my i zajmajemsia.
Pryznacca, ja nie vialiki prychilnik praviadzieńnie takich voś kanhresaŭ, dzie buduć vyznačać, chto bolšy «jeŭrapiejec», ci prychilnik jeŭraatłantyčnaj intehracyi, a chto mienšy. Mnie nie padabajucca hety bieh navypieradki.Budziem na Palitradzie partyi vyrašać, ci brać udzieł u Kanhresie. Jość šmat bolš aktualnych prablem, jakija treba vyrašać. Kali Kanhres prajeŭrapiejskich sił niejak pryblizić ich vyrašeńnie, to my, biezumoŭna, voźmiem u im udzieł», — skazaŭ A.Labiedźka.
Mikoła Statkievič kaža, što jon zhodzien, kab haradskija ŭłady dali dla praviadzieńnia Kanhresa navat placoŭku ŭ Parku družby narodaŭ, kali nie znojdziecca vialikich pamiaškańniaŭ.
Viadoma dakładna, što ŭ Kanhresie prajeŭrapiejskich sił voźmuć udzieł Partyja BNF, niezarehistravanyja partyi Statkieviča i Navasiada, «Małady front», a taksama małaviadomaja inicyjatyva Viačasłava Siŭčyka «Razam».
Vyhladaje na toje, što pry takim raskładzie siłaŭ vidavočnym adzinym kandydatam ad prajeŭrapiejcaŭ stanie Mikoła Statkievič.
