Nie mienš za 423 čałavieki byli zatrymanyja ŭ Biełarusi ad paniadziełka da piatnicy pa palityčnych matyvach. Stolki imionaŭ viedajuć pravaabaroncy-viasnoŭcy.
Takim čynam, ahulnaja ličba zatrymańniaŭ za čas pratestaŭ dasiahnuła 30 881.
Varta adznačyć, što hetyja ličby daloka nie poŭnyja. Zatrymanych stolki, što ŭličyć usich niemahčyma. Navat ahulnaja kolkaść ludziej, aryštavanych pa kryminalnych spravach, pakul dakładna nieviadomaja, bo ich vielmi šmat.
Na hety momant viadomy 551 čałaviek (praŭda, hety śpis pa spasyłcy taksama nie poŭny, bo za tydzień stali viadomyja novyja imiony), jakija prachodziać pa kryminalnych artykułach
— ad Siarhieja Cichanoŭskaha i Viktara Babaryki da žurnalistak Kaciaryny Barysievič i Kaciaryny Andrejevaj i rabočych Žłobinskaha mietałurhičnaha zavoda, dzie kryminalnuju spravu zaviali za zabastoŭku.
U Mazyry kryminalna sudzili dvuch padletkaŭ, jakija špurnuli kamiani ŭ aŭtazak. Adzin ź ich sirata.
U Breście pad vartu ŭziali 18-hadovaha Cichana Klukača — taksama kryminałka.
U niadzielu, akramia Minska, zatrymlivali ludziej taksama ŭ Breście, Lachavičach, Hrodnie, Maładziečnie, Viciebsku, Karobčycach, Baraŭlanach, Iŭi, Dziaržynsku, Mahilovie, Hatavie, Žodzinie.
Asabliva masavyja zatrymańni adbylisia ŭ Iŭi (nie mienš za 6 čałaviek), Žodzinie (pa roznych źviestkach, ad 8 da 13 čałaviek), Baraŭlanach (Lasny) — 18 čałaviek.
Siarod zatrymanych u Iŭi — Mustafa Bajtasaŭ. «Jon sprabavaŭ abaranić susiedku, jakuju ciahnuli ŭ bus, — raskazaŭ «Našaj Nivie» jaho staršy brat. — U Mustafy — čatyry niepaŭnaletnija syny, mienšamu jašče i hodzika niama».
Čytajcie taksama: Kali Rasija sapraŭdy nastojvaje na vyzvaleńni Babaryki, to što heta aznačaje
Možna z dakładnaściu skazać, što heta samyja masavyja palityčnyja represii ŭ Jeŭropie za apošnija 40 hadoŭ.
Dla paraŭnańnia: kali b u praporcyi na dušu nasielnictva stolki ž ludziej zatrymali ŭ Rasii, heta skłała b 450 tysiač. Kali b va Ukrainie ci Polščy — 120 tysiač.
Čytajcie taksama: Chłopiec pracavaŭ u KDB i chadziŭ na Maršy. Ciapier jamu biaskonca dajuć sutki — užo nabieh 71 dzień na Akreścina
Čytajcie taksama: «Naciahnuli na dubinku preziervatyŭ i sprabavali zasunuć u rot». Minčuk raskazaŭ pra ździeki padčas zatrymańnia
