«Skazaŭ u efir: «Vaša racyja ŭ mianie». Bieraściejca sudziać za skradzienuju ŭ amapaŭca racyju padčas akcyi pratestu

9 śniežnia ŭ Breście pačaŭsia sud nad 34-hadovym Dźmitryjem Ščurko. Jaho abvinavačvajuć u kradziažy milicejskaj racyi padčas akcyi pratestu 20 vieraśnia, piša Tut.by.

Abvinavačany — žychar Bresta. Raniej da kryminalnaj adkaznaści nie pryciahvaŭsia, adukacyja prafiesijna-techničnaja, vychoŭvaje dvaich dziaciej: vaśmi i dvuch hadoŭ.

Incydent, za jaki sudziać Dźmitryja Ščurko, adbyŭsia 20 vieraśnia. U hety čas na rahu vulic Savieckaj i Hohala sabralisia ŭdzielniki akcyi pratestu. Da ich padjechaŭ mikraaŭtobus ź siłavikami, pačalisia zatrymańni. Pavodle viersii abvinavačvańnia, mužčyna skarystaŭsia tym, što milicyjanty adciahnulisia na ŭdzielnikaŭ demanstracyi, i dastaŭ z padsumka broniekamizelki adnaho ź ich radyjostancyju. Vykradzienuju racyju jon panios dadomu. Praź dzień jaho vyklikali ŭ adździaleńnie milicyi, dzie jon viarnuŭ abstalavańnie. Va UUS škodu acanili ŭ 890 rubloŭ.

«Z padsumka jaje nichto nie vychoplivaŭ»

Bieraściejec vinavatym siabie nie pryznaŭ. Sudu jon raspavioŭ, što 20 vieraśnia pryjechaŭ na Savieckuju prahulacca:

— U rajonie kramy Solin's padjechaŭ mikraaŭtobus biez apaznavalnych znakaŭ. Ź jaho vyjšli ludzi biez apaznavalnych znakaŭ u čornaj formie. Pa ludziach [demanstrantach] adrazu było vidać, što jany napałochanyja: jany, jak i ja, nie bačyli, chto znachodzicca pierad imi. Dalej častka ludziej arhanizavalisia ŭ ścienku abaraniacca. Atrymałasia tak, što ja akazaŭsia prycisnuty da budynka hetaj ścienkaj i napadnikami.

Kala kramy zaviazałasia bojka. Siłaviki padbiehli da Dźmitryja, skazali jamu «lažać» i pasprabavali «skrucić».

— Ja paprasiŭ dapamohi, mianie vyzvalili. Paśla čaho ja ŭbačyŭ na plitcy racyju. Ni ŭ kaho z padsumka jaje nichto nie vychoplivaŭ. Racyja lažała na plitcy, — paŭtaraje abvinavačany.

Jon kaža, što padniaŭ jaje ź plitki dla taho, kab «dałučyć da kryminalnaj spravy suprać nalotčykaŭ».

Paśla hetaha Dźmitryj adyšoŭ ad miesca zatrymańnia i skazaŭ u radyjostancyju: «U mianie vaša racyja». Jamu nichto nie adkazaŭ. Z vulicy Hohala bieraściejec pajšoŭ na rynak, kupiŭ novuju majku, bo staruju parvali padčas bojki, i źjechaŭ dadomu.

Praź dzień Dźmitryju patelefanavali z kryminalnaha vyšuku i skazali padyści ŭ milicyju. U rajadździele bieraściejec viarnuŭ racyju. Zatym jaho dapytali, zatrymali i adpravili ŭ IČU Leninskaha RAUS.

U sudzie mužčyna rastłumačyŭ, što kraści racyju jon nie źbiraŭsia. Z tratuara jon jaje padabraŭ dla taho, kab vykarystoŭvać u jakaści dokazu złačynstvaŭ nieviadomych, jakija zatrymlivali mirnych demanstrantaŭ. Takoj kryminalnaj spravy, viadoma, nie zavodziłasia, a sam Dźmitryj da zvanka z kryminalnaha vyšuku ni ŭ milicyju, ni ŭ SK, ni ŭ prakuraturu z zajavaj nie źviartaŭsia.

— Nie paśpieŭ, — patłumačyŭ bieraściejec. — Ja znachodziŭsia ŭ nievialikim šoku, kansultavaŭsia, jak raspačać spravu ab napadzie, sprobie vykradańnia. Ja ŭ hetym nie śpiecyjalist, mnie treba byŭ čas. Ja i nie viedaŭ tołkam, kudy jaje [racyju] viartać, — raspavioŭ jon.

«Taki šaŭron na kałhasnym rynku kaštuje 3 rubli»

Na pieršym sudovym pasiadžeńni taksama vyvučyli piśmovyja materyjały spravy. Siarod ich byŭ dysk ź videazapisami. Na adnym z rolikaŭ vidać, jak čałaviek, padobny da Dźmitryja, adbiahaje ad natoŭpu, dzie prachodziać zatrymańni. U padniataj ruce jon trymaje radyjostancyju. Taksama pa zapisach vidać, što ŭ siłavikoŭ na rukavach byli našyŭki AMAPa.

— Tak, byŭ šaŭron, ale taki na kałhasnym rynku kaštuje 3 rubli, — paviedamiŭ sudu Dźmitryj.

Na hetym sudździa abviaściŭ pierapynak da 18 śniežnia. Na nastupnym pasiadžeńni zasłuchajuć śviedku — supracoŭnika AMAPa.

Dźmitryju, kali jaho pryznajuć vinavatym u kradziažy, pahražajuć hramadskija abo papraŭčyja raboty, štraf, aryšt, da troch hadoŭ abmiežavańnia abo pazbaŭleńnia voli.

• 0
• 0
• 0
• 0
• 0
• 0
• 0
• 0