Kiraŭnik Kamiteta dziaržbiaśpieki Ivan Cierciel 17 śniežnia vystupiŭ pierad kalektyvam pradpryjemstva «Hrodna-Azot». Havaryli na aktualnyja temy. «Naša Niva» atrymała aŭdyjazapis sustrečy. Siarod inšaha, Ivan Cierciel niehatyŭna acaniŭ sacyjalna-ekanamičnuju situacyju ŭ Polščy.
«Paźbiehnuć, prajści ŭsie ryzyki daloka nie ŭsim krainam udajecca. Nie zrazumieła, jak jašče skončycca situacyja ŭ Polščy, jana ich našmat bolš surjoznaja pa šerahu aśpiektaŭ, čym u nas. Heta prosta nie aśviatlajecca. Niedzie ŭ nas pa aficyjnym telebačańni ci pa Jeŭrańjus miž inšym pakazvajuć, što ŭ Varšavie pierakryvajuć vulicy, tam manifiestacyi i masy narody kirujucca inšymi metami.
U ekanomicy Polščy surjoznyja prablemy, i tam praktyčna ruchnuła sistema achovy zdaroŭja na fonie kavidu, bo tam treba za ŭsio płacić. Miedycyna płatnaja, jana ŭsia razvalena.
U Litvie ŭvohule siamiejnyja daktary! Infiekcyjanistaŭ jak takich uvohule nie zastałosia.
Nie jasna, čym zakončycca situacyja ŭ Štatach. Čamu Amieryka zajmaje krychu ŭzvažanuju pazicyju? Bo amierykancy pamiž saboj abmiarkoŭvajuć: jak my možam abmiarkoŭvać, što adbyvajecca ŭ Biełarusi, kali pahladzicie, što ŭ nas adbyvajecca ŭ paŭdniovych štatach — hinuć palicejskija (bolš za 100 zahinułych na kastryčnik)».
Varta adznačyć, što reakcyja prysutnych rabotnikaŭ na vystup Cierciela była rezkaja, pytańni hučali vyklučna krytyčnyja, a adzinyja apładysmienty za čas sustrečy prahučali paśla adnaho z takich rezkich pytańniaŭ.
«Pierad tym, jak zadać paru pytańniaŭ, chaču prakamientavać vašy słovy. Što tyčycca Polščy, Hiermanii. Sprava ŭ tym, što ŭ ludziej, jakija siadziać u zale, šmat rodzičaŭ pracujuć za miažoj. My ź pieršych vusnaŭ viedajem, što tam robicca, tamu ja b nie zusim z vami pahadziŭsia, što tam čort viedaje što, — skazaŭ kiraŭniku KDB adzin z načalnikaŭ cechaŭ. — Što tyčycca Amieryki, vy nie zabyvajcie, što tam volny prodaž zbroi, i tam luby hramadzianin moža volna jaho nabyć. Tamu dziejańni palicejskaha hetym abhruntavanyja, bo ŭ jaho kišeni moža pistalet lažać. U nas, prabačcie, ludzi biez zbroi. Što ŭ vašym razumieńni demakratyja takoje, voś vy patłumačcie, kab my razumieli? My zrazumieli adno: nie vysoŭvajciesia, siadzicie, inačaj vas «zamočać u sarciry».
Čytajcie taksama: U Polščy z 2021 hoda minimalny zarobak składzie 629 jeŭra
Minimalny zarobak u Litvie vyraście da 642 jeŭra
