Fota Nadziei Bužan
Aficyjny Minsk u adkaz na treci pakiet sankcyj ES zabaronić ujezd u Biełaruś i na terytoryju Sajuznaj dziaržavy šerahu jeŭrapiejskich čynoŭnikaŭ i pierahledzić realizacyju šerahu humanitarnych, adukacyjnych, kulturnych prahram, u tym liku dziejnyja i pad ehidaj pasolstvaŭ zamiežnych dziaržaŭ. Ab hetym kiraŭnik MZS Uładzimir Makiej zajaviŭ žurnalistam, piša Tut.by.
Makiej čarhovym razam paŭtaryŭ, što Minsk kateharyčna nie prymaje palityku i łohiku sankcyj, ale «vymušany adkazvać adekvatna na tyja niedružalubnyja restryktyŭnyja zachady, jakija, na žal, robiać našy partniory ŭ dačynieńni da Biełarusi».
— My ŭvažliva vyvučyli ŭvieś tak zvany treci pakiet restryktyŭnych mier, i, naturalna, my prapanavali našy dziejańni ŭ adkaz na hety pakiet. Jany ŭklučajuć u siabie taksama pavieličeńnie adpaviednaha piersanalnaha śpisu. Heta aznačaje, što šerah dadatkovych pierson z krain Jeŭrasajuza nie zmohuć trapić na terytoryju Biełarusi i na terytoryju Sajuznaj dziaržavy, z ulikam taho, što ŭ nas hety śpis adnolkavy z Rasijskaj Fiederacyjaj. My raspačniom, naturalna, šerah dziejańniaŭ jurydyčnaha charaktaru ŭ adkaz na absalutna nieabhruntavanaje ŭklučeńnie šeraha pradpryjemstvaŭ i piersanalij u śpis ES, — zajaviŭ Uładzimir Makiej.
Akramia taho, aficyjnym Minskam pryniataje rašeńnie ab abmiežavańni dziejnaści šerahu palityčnych fondaŭ u Biełarusi, a taksama ab pierahladzie realizacyi šerahu humanitarnych, adukacyjnych, kulturnych prahram, jakimi zajmajucca adpaviednyja palityčnyja instytuty ŭ Biełarusi, u tym liku dziejučyja i pad ehidaj pasolstvaŭ.
— Jość jašče jak minimum try napramki, pa jakich buduć pryniaty adekvatnyja miery ŭ adkaz z boku Biełarusi ŭ adras našych jeŭrapiejskich partnioraŭ. My nie chacieli b ahučvać hetyja miery, ale jany buduć sapraŭdy vielmi adčuvalnymi i surjoznymi, — skazaŭ Makiej.
