Były dypłamat znachodzicca ŭ Varšavie, u sudzie jahonyja intaresy pradstaŭlaje advakat Siarhiej Zikracki. Fota «Radyjo Svaboda»
Dyplamat ličyć, što jaho zvolnili ź nieadpaviednaj farmuloŭkaj. Jamu tak i nie patłumačyli, za jaki mienavita ŭčynak zvolnili. Suprać samoha Ŭładzimiera Astapienki spravu zaviała Hienprakuratura, piša Svaboda.
Były ambasadar Biełarusi ŭ Arhientynie i šerahu inšych krainaŭ Łacinskaj Ameryki Ŭładzimier Astapienka padaŭ u adstaŭku ŭ dzień inaŭhuracyi Łukašenki ŭ kancy vieraśnia. Dyplamat chacieŭ zvolnicca «pa zhodzie bakoŭ». Adnak u kancy kastryčnika jon adklikaŭ svaju zajavu i źviarnuŭsia ŭ MZS z novaj, dzie patrabavaŭ svajho zvalnieńnia ŭ suviazi z parušeńniem zakanadaŭstva najmalnikam.
Uładzimier Astapienka
Na dumku byłoha ambasadara, dziejańni biełaruskaha MZS spryjajuć pryznańniu nielehitymnaści kiraŭnika dziaržavy, a taksama viaduć da mižnarodnaj izalacyi Biełarusi. Što, u svaju čarhu, robić niemahčymym vykanańnie im svaich abaviazkaŭ.
Zvolnili Astapienku praz tydzień paśla hetaha admysłovym ukazam Łukašenki, dzie śćviardžałasia, što były ambasadar ździejśniŭ učynak, nie sumiaščalny z zajmanaj pasadaj. U svaim pazovie da MZS dyplamat adznačaje, što sa zvalnieńniem zhodny, adnak kateharyčna nie pahadžajecca z farmuloŭkaj. Uładzimier Astapienka nastojvaje na tym, što ŭ suviazi ź dziejańniami aficyjnaha Miensku bolš nie ličyŭ mahčymym vykonvać svaje abaviazki jak dyplamat, i mienavita heta stała pryčynaj zvalnieńnia.
Pasiedžańnie pa pazovie Astapienki pačaŭ razhladać Leninski sud Miensku. Pradstaŭniki MZS na pracesie nie źjavilisia. Advakat Uładzimiera Astapienki Siarhiej Zikracki padaŭ chadajnictva ab dystancyjnym apytańni Astapienki, jaki ciapier znachodzicca ŭ Varšavie. Adnak sudździa Volha Šodar admoviła ŭ hetym «u suviazi ź niemahčymaściu arhanizacyi kanferenc-suviazi». Zaŭvahu advakata Zikrackaha, što ciapier u Biełarusi rehularna prachodziać pracesy z apytańniem śviedak i abvinavačanych z dapamohaj videasuviazi, sudździa taksama adchiliła.
Zikracki prasiŭ jašče dałučyć da zajavy Astapienki spravazdačy pravaabaroncaŭ ab šmatlikich parušeńniach vybarčaha zakanadaŭstva i prymianieńni hvałtu ŭ dačynieńni da mirnych hramadzian z boku ŭładaŭ. U tym liku spravazdaču misii ABSE. Hetuju prośbu sudździa nie zadavoliła.
«U takoj sytuacyi, jakaja skłałasia ŭ Biełarusi paśla prezydenckich vybaraŭ 9 žniŭnia, Astapienka nia moh ažyćciaŭlać svaje funkcyi ambasadara Respubliki Biełaruś, — skazaŭ u svaim vystupie advakat Zikracki. — Praz sytuacyju ŭ Biełarusi jon nia zmoh udzielničać u cyrymonii ŭručeńnia hramat prezydentu Peru, choć mieŭ na rukach takija dakumenty… Uładzimier Astapienka byŭ zvolnieny ŭkazam kiraŭnika dziaržavy ŭ suviazi sa «ździajśnieńniem učynku, niesumiaščalnaha sa znachodžańniem na dyplamatyčnaj słužbie». My ličym heta nieabhruntavanym. Niahledziačy na šmatlikija sproby daviedacca, što heta byŭ za ŭčynak, Uładzimier Astapienka tak i nia zmoh hetaha zrabić».
Pavodle advakata Zikrackaha, sud abaviazany pravieryć zakonnaść zvalnieńnia ambasadara Astapienki i maje ŭsie pracesualnyja pravy dla taho, kab pryznać, što Astapienka nie ździajśniaŭ ničoha, što mahło b być padstavaj dla jaho zvalnieńnia. Taksama abaronca padaŭ chadajnictva ab atrymańni tłumačeńniaŭ pra charaktar učynku Ŭładzimiera Astapienki, jaki staŭ pryčynaj jaho zvalnieńnia. Hetaje chadajnictva sudździa Šodar tasama adchiliła.
«Ja vymušany zajavić advod sudździ, — skazaŭ advakat Siarhiej Zikracki, kali sudździa čarhovy raz admoviłasia zadavolić jaho chadajnictva. — U nas uźnikli abstaviny, jakija vyklikajuć padazreńni ŭ abjektyŭnaści i biesstaronnaści sudździ».
Advod siabie sudździa Volha Šodar taksama pakinuła biez zadavalnieńnia. Padčas vyvučeńnia materyjałaŭ spravy jana paviedamiła, što tam jość niekalki dakładnych zapisak ab adsutnaści Ŭładzimiera Astapienki na pracoŭnym miescy ŭ pačatku listapada.
«My miarkujem, što nieabchodna ŭdakładnieńnie pazycyi samoha zajaŭnika pa ahučanych materyjałach, — zajaviŭ advakat Astapienki Siarhiej Zikracki. — Hramadzianski pracesualny kodeks praduhledžvaje prava zajaŭnika ŭdzielničać u sudovym pasiedžańni. Prosim abviaścić pierapynak».
Sudździa Šodar na heta adkazała, što abviaščaje pierapynak u spravie da 12 hadziny 24 śniežnia.
21 śniežnia stała viadoma, što suprać samoha Ŭładzimiera Astapienki kryminalnuju spravu zaviała Hienprakuratura. Jaho abvinavačvajuć u kradziažy 2393 dalaraŭ praz złoŭžyvańnie słužbovym stanoviščam. Sam dyplamat nastojvaje, što hetyja hrošy vykarystaŭ na viartańnie z Arhientyny razam ź siamjoj i bahažom. I navat zekanomiŭ srodki ambasady, bo prylacieŭ nia ŭ Miensk, a ŭ Varšavu, što abyšłosia tańniej. Ab pracesualnych dziejańniach pa hetaj spravie pakul ničoha nieviadoma.
Na eks-pasła Astapienku, jaki vystupiŭ suprać Łukašenki, zaviali spravu — nibyta skraŭ $2393
«Kradziež u tym, što ja nie dalacieŭ da Minska»: były pasoł Biełarusi ŭ Arhiencinie raskazvaje pra «kradziež» 2393 dalaraŭ
