Na sustrečy ŭ Minsku 28 maja Alaksandr Łukašenka i Uładzimir Pucin «abmierkavali tyja prablemnyja pytańni, jakija isnujuć u adnosinach dźviuch krain», paviedamlaje pres‑słužba prezidenta Biełarusi.
U centry ŭvahi prezidentaŭ taksama znachodzilisia «prablemy, jakija tyčacca suśvietnaha finansava‑ekanamičnaha kryzisu», adznačajecca ŭ pres‑relizie.
«Dumaju, naša sustreča ŭ Minsku, jak i zaŭsiody, budzie karysnaj i praduktyŭnaj i hetym razam», — cytuje Łukašenku jaho pres‑słužba.
Adnoj z najvažniejšych prablem biełaruska‑rasijskich adnosinaŭ nazyvajecca «vykanańnie rasijskim bokam rašeńniaŭ, pryniatych pavodle vynikaŭ lutaŭskaha pasiadžeńnia Vyšejšaha dziaržsavieta Sajuznaj dziaržavy Biełarusi i Rasii».
«Na žal, davodzicca kanstatavać, što realizacyja damoŭlenaściej, dasiahnutych na vyšejšym uzroŭni, pakul tarmozicca, i adbyvajecca heta zusim nie pa vinie Minska, — padkreślivajecca ŭ pres‑relizie. — Biełaruskija tavary ź vialikaj ciažkaściu prabivajucca na rasijskija rynki, niahledziačy na adzinuju ekanamičnuju prastoru, mahutniejšuju pramysłovuju kaapieracyju, jakaja pradvyznačaje značnuju dolu rasijskaha praduktu ŭ biełaruskich tavarach».
Uładzimir Pucin, paviedamlaje pres‑słužba, «vykazaŭ nadzieju na zachavańnie dynamiki biełaruska‑rasijskaha tavaraabarotu ŭ pieryjad suśvietnaha kryzisu».
«Što da biahučych spraŭ u ekanomicy, to my zdoleli zrabić šmat. Ahulnymi namahańniami nam udałosia źbić tempy padzieńnia tavaraabarotu pamiž našymi krainami nasupierak suśvietnamu kryzisu», — skazaŭ Pucin.
«Siońnia na pasiadžeńni sajuznaha Saŭmina, — dadaŭ jon, — my padumajem, što zrabić dadatkova dla taho, kab kančatkova spynić hetaje padzieńnie tavaraabarotu i vyjści na stanoŭčuju dynamiku».
Pucin, paviedamlaje pres‑słužba, pavinšavaŭ Łukašenku z abrańniem Biełarusi krainaj praviadzieńnia čempijanatu śvietu pa chakiei ŭ 2014 hodzie: «Heta dobraja navina i dla Biełarusi, i dla Rasii. Niahledziačy na ŭsie prablemy, źviazanyja z kryzisam, hetaja padzieja — pazityŭny sihnał, jaki havoryć ab tym, što my hladzim u budučyniu».
