12-14 červienia na miažy Litvy i Biełarusi projdzie treci mižnarodny fiestyval muzyki i mastactvaŭ Be2gether. Z pryčyny, što placoŭka znachodzicca na terytoryi Litvy i na peŭnaj adlehłaści ad bujnych haradoŭ, paŭstaje łahičnaje pytańnie: jak tudy dabracca?
Z mašynaj
Da Narvilišak ad Minsku kala 200 kiłamietraŭ. Heta pa maršrucie Lida – Šalčyninkaj – Dzievianiškies – Daŭlanaj – Narviliškies. Možna zajechać i ŭ Vilniu, choć heta značna padoŭžyć vašuju darohu. U lubym vypadku hałoŭnaje — nie zabyć aformić da ŭjezdu na terytoryju Litvy aŭtamabilnuju strachoŭku (“zialonaja karta”, kaštuje 30 jeŭra).
Biez mašyny
Kab dabracca da fiestyvalnaj placoŭki biez mašyny, treba da abiedu 12 červienia pryjechać u Vilniu. Kožny dzień u 6.30 ź Minsku tudy idzie ciahnik, kvitok na jaki kaštuje ŭsiaho 23 tysiačy. Z aŭtavakzału “Uschodni” ŭ Vilniu štodnia idzie niamała aŭtobusaŭ (padychodziać 7.20, 8.20), košt prajezdu ŭ jakich składaje 37,5 tys. rubloŭ. Na lubym z hetych vidaŭ transpartu možna dabracca da litoŭskaj stalicy prykładna za 4 hadziny.
Potym treba apynucca na aŭtavakzale Vilni. Heta nieskładana, bo mienavita tudy pryjazdžaje aŭtobus Minsk – Vilnia, a ad čyhunačnaha vakzału da jaho piecham usiaho 3 chviliny. 12 červienia ŭ 11.00, 12.00, 13.40 i 14.35 z aŭtavakzału vypraŭlajucca fiestyvalnyja aŭtobusy da Narvilišak. Arhanizatary abiacajuć dastatkovuju kolkaść transpartu dla ŭsich achvotnych. Košt prajezdu da fiestyvalnaj placoŭki składzie 18 litaŭ (kala 20 tys. rubloŭ).
Asnoŭnyja vystupy fiestyvalu buduć prachodzić amal kruhłasutačna z abiedu 12 červienia, a skončycca jon udzień 14 červienia, paśla čaho znoŭ ža aŭtobusam možna budzie dajechać da Vilni. Chedłajnierami fiestyvalu sioleta buduć Gogol Bordello (ZŠA), Clawfinger (Šviecyja), Touch And Go (Vialikabrytanija), Polarkreis 18 (Hiermanija), Roni Size (Vialikabrytanija), Dilated Peoples (ZŠA). Biełaruś prezientujuć hurty "Lapis Trubieckoj" i "The Toobes".
Kvitok na ŭsie dni fiestyvalu kaštuje 160 tys. rub. Padčas zvarotu ŭ ambasadu Litvy da 1 červienia ŭklučna biełaruskim naviedvalnikam fiestyvalu dajecca biaspłatnaja viza. Nabyć kvitki možna pa telefonach (029) 6 5555 96, (033) 6 5555 96, a taksama praz sajt www.soundline.by i ŭ kancertnych kasach Minsku.
