27 maja im prad`iaŭlena abvinavačańnie ŭ złosnym chulihanstvie.
11 listapada 2008 hoda Baraŭlanskim adździełam UUS Minskaha rajvykankama była raspačata sprava pa č. 2 art. 346 Kryminalnaha kodeksa (ździek z historyka-kulturnych kaštoŭnaściej) da dvuch niepaŭnaletnich minčan, zatrymanych uviečary 1 listapada 2008 hoda na terytoryi historyka-kulturnaj kaštoŭnaści I katehoryi «Miesca źniščeńnia achviar palityčnych represij 1930—1940-ch hadoŭ va ŭročyščy Kurapaty» i padazravanych u źniščeńni pamiatnych kryžoŭ.
11 studzienia 2009 hoda śledčy Baraŭlanskaha adździeła Minskaha RUUS Alena Chilčuk spyniła kryminalny pieraśled padazronych, matyvujučy svajo rašeńnie tym, što dokazaŭ, atrymanych u chodzie rasśledavańnia, niedastatkova dla pieradačy spravy ŭ sud i pryciahnieńnia da kryminalnaj adkaznaści maładych ludziej — navučencaŭ škoły i praftechvučylišča.
U kancy studzienia namieśnik prakurora Minskaha rajona Ernest Kajro pryznaŭ «niezakonnym i nieabhruntavanym» rašeńnie A.Chilčuk ab spynieńni kryminalnaha pieraśledu maładych ludziej, a taksama ab prypynieńni papiaredniaha rasśledavańnia pa kryminalnaj spravie z-za taho, što nie ŭstanoŭlena asoba, jakaja padlahaje pryciahnieńniu da adkaznaści ŭ jakaści abvinavačanaha. 29 studzienia kryminalnaja sprava z ukazańniami była nakiravana ŭ Minskaje RUUS dla dadatkovaha papiaredniaha rasśledavańnia. Z 28 lutaha spravu viadzie śledčy S.Bułko.
Pavodle jaho słoŭ, pakolki źniščanyja pamiatnyja kryžy nie adnosiacca da historyka-kulturnych kaštoŭnaściej, sprava była pierakvalifikavana i maładym ludziam prad`iaŭlena abvinavačańnie pa č. 2 art. 339 KK (złosnaje chulihanstva), jakaja praduhledžvaje aryšt na termin ad troch da šaści miesiacaŭ, abo abmiežavańnie voli na termin da piaci hadoŭ, abo pazbaŭleńnie voli na termin ad adnaho hoda da šaści hadoŭ.
Treba adznačyć, što ŭpieršyniu za mnohija hady śledstva prad`iaviła abvinavačańnie kankretnym asobam, padazravanym va ŭčynieńni aktaŭ vandalizmu ŭ Kurapatach.
Ciapier pa hetych faktach rasśledujucca try kryminalnyja spravy.
