Illa (źleva) i Jaŭhien
26-hadovy Illa — fizik, navukovy supracoŭnik Akademii navuk Biełarusi. Skončyŭ BDU. Zajmaŭ pryzavyja miescy na mižnarodnych alimpijadach, byŭ adnym z aktyvistaŭ kłuba Student Network, jaki arhanizoŭvaŭ lekcyi i treninhi dla studentaŭ. Ciapier zajmajecca daśledavańniami ŭ halinie kvantavaj optyki.
«Jon vučony pa svaim paklikańni. U toj čas, kali jaho siabry źjazdžali na stažyroŭki ŭ Jeŭropu, jon chacieŭ zastacca pracavać tut», — raskazvaje pra chłopca stryječnaja siastra Maryna.
Razam ź inšymi navukoŭcami Illa paśla vybaraŭ udzielničaŭ u łancuhach salidarnaści, za što ciapier pad asablivaj uvahaj kiraŭnictva. U svaim profili na Linkedin jon pakidaŭ spasyłki na adkrytyja listy ŭ abaronu kaleh, što patrapili pad represii.
Žonka Illi, Sofja, taksama fizik, pracuje razam ź im.
Jaŭhienu 29 hadoŭ. Jon vypusknik BDUIRa, pracuje inžynieram na dziaržaŭnym pradpryjemstvie. Z małodšym bratam jany vielmi blizkija.
«Jany honar baćkoŭ. U nas usia siamja z aktyŭnaj pazicyjaj. My z bratami palityčnaj situacyjaj jašče z 2010 hoda cikavilisia. Chłopcy zaŭsiody byli za spraviadlivaść, za praŭdu. Ličać svaim abaviazkam być na maršach. Śmiełyja, tamu i patrapili ŭ ruki AMAPa, prosta nie zachacieli ŭciakać», — dzielicca stryječnaja siastra.
Pieršy raz bratoŭ zatrymali 15 listapada padčas maršu na płoščy Pieramien. Illu tady adpuścili, a Jaŭhienu dali 15 sutak.
«Ceły tydzień jon pravioŭ bieź pieradačy. Kali my pryjšli ŭ čaćvier na Akreścina, rečy nie ŭziali, skazali, što Ženi tut užo niama. A jon tam nasamreč siadzieŭ da suboty, tolki potym jaho pieraviali ŭ Baranavičy», — uspaminaje Maryna.
U hety raz chłopcaŭ (a ź imi jašče 14 čałaviek) schapili na dvaravym maršy. Sudździ Frunzienskaha rajona Andrej Mlečka i Dźmitryj Łukaševič vypisali im na dvaich 40 sutak.
