Karpiankoŭ anansavaŭ vydaču śmiarotnaj zbroi «družyńnikam» i paŭtaryŭ tezis pra «lišnich ludziej»
U numary časopisa «Śpiecnaz» za listapad — śniežań 2020 hoda vyjšła hutarka z namieśnikam ministra ŭnutranych spraŭ Mikałajem Karpiankovym. Aŭtar — hałoŭny redaktar Andrej Dziemiancjeŭski.
Mikałaj Karpiankoŭ u centry, sa ściaham
Voś asobnyja cytaty:
- «Užo kinuty hramadstvu klič i padtrymany ŭ asiarodku pravaachoŭnikaŭ, uchvaleny kiraŭnikom dziaržavy — ab farmavańni družyn. Ź liku vieteranaŭ śpiecpadraździaleńniaŭ, inšych siłavych hrup, jakija vałodajuć pryjomami rukapašnaha boju. Padčas vystupleńniaŭ ahresiŭnych małodčykaŭ my budziem vyjazdžać razam z takimi dobraachvotnikami, kab rabić našu krainu biaśpiečnaj, ratavać hramadstva ad chulihanaŭ, niedaroblenych ekstremistaŭ i terarystaŭ, jakija ličać siabie hieraičnymi partyzanami. Hetych admarozkaŭ my budziem vymać z vulicy, prymianiajučy da ich bajavyja pryjomy».
- «Jość kamanda: siarod sfarmavanych družyn pravieści patrebnyja pravierki i pry nieabchodnaści vydać našym najbolš pradrychtavanym pamočnikam śmiarotnuju i nieśmiarotnuju zbroju. Kab chutčej vystajać i navieści paradak, spakojna praciahnuć pastupovaje raźvićcio našaj dziaržavy».
- «Razvažnyja ludzi z vulic syšli. Zastalisia «zmahary», jakija, pa sutnaści, stali lišnimi ŭ našym hramadstvie. Jany zaŭsiody łajdačyli, zajmalisia paŭbandyctvam, šerymi schiemami».
- «Naša meta — pierakryć im kanały finansavańnia. Prybrać lidaraŭ novastvoranych arhanizavanych złačynnych hrupovak, jakija źbilisia ŭ kuču, abmiarkoŭvajučy na dvaravych čajapićciach sa stužkami płany supracivu pravaachoŭnym orhanam».
- «Za harełku, za narkotyki, za nievialikija hrošy marhinały hatovyja na ŭsio. Jany chočuć uvasobić svaju maru: apynucca na samym viersie hramadstva — biez sacyjalnych liftaŭ, biez adukacyi, biez pracy, nie napružvajučysia. Skarystacca chaosam i być u adnym šerahu z palityčnymi samazvancami».
Raniej hołasam, padobnym da Karpiankova, užo ahučvaŭsia tezis pra «lišnich ludziej» — pres-słužba MUS nazvała toj «źliŭ» fejkavym.
MUS pra skandalny zapis: My nie kamientavali i nie budziem kamientavać fejki
Mikałaj Karpiankoŭ, 52 hady. Uznačalvaŭ śpiecatrad «Ałmaz», słužyŭ na roznych pasadach u Słužbie biaśpieki prezidenta, z 2014 pa kaniec 2020-ha kiravaŭ HUBAZiK MUS, z 19 listapada — kamandujučy ŭnutranymi vojskami, namieśnik ministra ŭnutranych spraŭ.
Kamientary