«Paŭnočny patok — 2» pad pahrozaj pravału

Šmatmiljardny prajekt u Bałtyjskim mory zaviaršajecca. Zastałosia dabudavać tolki 148 z 1230 kiłamietraŭ hazapravoda. Prajekt byŭ raspačaty z metaj transparciroŭki bolšaj kolkaści rasijskaha hazu ŭ Zachodniuju Jeŭropu praz Hiermaniju, piša vydańnie DW.

Adnak supraciŭleńnie raście. Prajekt pad pahrozaj zakryćcia ŭsiaho za niekalki miesiacaŭ da jaho zaviaršeńnia. Prezident ZŠA Džo Bajden źbirajecca zachavać sankcyi, uviedzienyja jaho papiarednikam. Ale niahledziačy na palityčnuju sprečku, budaŭnictva praciahvajecca.

Jašče da inaŭhuracyi Bajdena było zrazumieła, što transatłantyčnym adnosinam nieabchodny novy start: viarnucca da papiaredniaha partniorstva, šmatbakovaści i mižnarodnaha supracoŭnictva. Ale dasiahnuć hetaha budzie nie tak prosta.

Dziaržsakratar ZŠA Entani Blinkien na słuchańniach u Sienacie paabiacaŭ zachavać sankcyi, pryniatyja Kanhresam ZŠA, kab spynić budaŭnictva hazapravoda. Toj ža pazicyi prytrymlivajecca i Džo Bajden.

Takaja pazicyja ZŠA tłumačycca ekanamičnymi intaresami: Vašynhton zacikaŭleny ŭ prodažy amierykanskaha hazu ŭ Jeŭropu, a budaŭnictva «Paŭnočnaha patoku-2» budzie hetamu pieraškadžać. Akramia taho, isnuje źniešpalityčnaja meta — zachavać daminantnaje stanovišča ZŠA i nie dapuścić rostu mocy Rasii.

Prezident Rasii Uładzimir Pucin, u svaju čarhu, nastojvaje na tym, što prajekt budzie zavieršany. Na pres-kanfierencyi ŭ śniežni jon adznačyŭ, što «Paŭnočny patok-2», biez sumnieńniaŭ, vyhadny prajekt dla ŭsioj ekanomiki Jeŭropy.

Kanstancin Kasačoŭ, staršynia Kamiteta zamiežnych spraŭ Savieta Fiederacyi, śćviardžaje: «U našym stratehičnym płanie my zychodzim z taho, što Hiermanija zaŭsiody razhladała hety prajekt jak vyklučna ekanamičny, a nie palityčny. My ličym, što hetaj pazicyi varta prytrymlivacca i dalej».

Adnak nie ŭsie ŭ Rasii padzialajuć heta mierkavańnie. Partnior kansałtynhavaj kampanii RusEnergy Michaił Krucichin ličyć, što prajekt daŭno miortvy sa śniežnia 2019 hoda, kali Kanhres ZŠA pryniaŭ zakon ab sankcyjach.

A ŭ siaredzinie studzienia rasijskaja dziaržkarparacyja «Hazpram», jakaja zajmajecca budaŭnictvam «Paŭnočnaha patoku-2», zajaviła, što nie vyklučaje mahčymaści pravału prajekta. U Rasii heta navina vyklikała ažyjataž, bo, kali budaŭnictva hazapravoda nie budzie zavieršanym, krainie pryjdziecca transpartavać svoj haz praz Ukrainu.

ES nastojvaje na tym, što hety prajekt datyčycca tolki Hiermanii. Ź inšaha boku, na minułym tydni Jeŭraparłamient bolšaściu hałasoŭ zaklikaŭ admovicca ad «Paŭnočnaha patoku-2», bo Rasija maje zavialiki ŭpłyŭ na jeŭrapiejski enierhietyčny rynak, a Kreml musić być pakarany za parušeńnie pravoŭ čałavieka.

Siarod krain-členaŭ ES za budaŭnictva hazapravoda vystupajuć Hiermanija, Niderłandy, Aŭstryja i Francyja.

Polšča i Litva, u svaju čarhu, bačać mahčymaść šantažu z boku Rasii, a taksama pahrozu krainam-tranzitaram hazu, takim, jak Ukraina i Słavakija.

Kali havorka idzie pra sankcyi z boku ZŠA, to Jeŭrakamisija pierakananaja, što heta parušyć mižnarodnaje prava i pryviadzie da zvarotnych sankcyj.

Niamiecki ŭrad pazityŭna aceńvaje budaŭnictva hazapravoda i zaŭsiody imkniecca padkreślić, što heta vyklučna ekanamičny prajekt. Paśla atručvańnia Alaksieja Navalnaha Hiermanija była pad mocnym mižnarodnym ciskam, kab kraina admoviłasia ad prajekta. Na heta niamiecki ŭrad adkazvaŭ, što sprava Navalnaha i hazapravod — rečy, jakija nijak nie suadnosiacca pamiž saboj.

Zapasy hazu ŭ Hiermanii i Jeŭropie na ciapierašni momant dastatkovyja, tamu zaviaršeńnie budaŭnictva «Paŭnočnaha patoku — 2» nie ŭjaŭlaje saboj pahrozy dla enierhazabieśpiačeńnia Hiermanii. Adnak cana na haz źnizicca značna, kali prajekt usio ž taki budzie zavieršany, śćviardžajuć ekśpierty.

U toj ža čas ekśpierty pa ekałahičnych pytańniach ličać, što dla dasiahnieńnia metaŭ pa abaronie klimatu Hiermanii nieabchodna całkam admovicca ad vykarystańnia nafty, vuhalu i hazu. Adnoj z asnoŭnych prablem vykarystańnia pryrodnaha hazu źjaŭlajecca vysoki ŭzrovień vykidaŭ parnikovych hazaŭ, u pryvatnaści mietanu, jaki, pa źviestkach Mižuradavaj hrupy ekśpiertaŭ pa źmienie klimatu, za 20-hadovy pieryjad mieŭ u 87 razoŭ horšy ŭpłyŭ na navakolnaje asiarodździe, čym vuhlakisły haz.

• 0
• 0
• 0
• 0
• 0
• 0
• 0
• 0