Karotkaja pieradhistoryja. U kastryčniku haspadyniu kramy i rekłamnaha ahienctva «Chamieleon» Kryścinu Ivanovu dvojčy sudzili pa artykule 23.34 — za fota ŭ instahramie sa ściaham. Ahułam aštrafavali na 50 bazavych. Pieršy raz zatrymlivali, jak u bajeviku: dziaŭčyna z pryjacielami viartałasia ź Minska, kali ich mašynu na trasie spyniŭ bus z amapaŭcami i DAI.
Paśla hetaha na kramu pačali nibyta pastupać ananimnyja skarhi. Było ažno 8 pravierak. Spačatku enierhanahlad — pytalisia ŭ susiedziaŭ pa ofisie, ci jość ŭ pradprymalnicy jakija kasiaki i niaspłaty. Paśla sanstancyja — byccam u kramie nie prytrymlivajucca antykavidnych mier.
Potym Kryścinie nie chacieli praciahvać damovu arendy: ceły miesiac jany bilisia nad hetym pytańniem i ŭrešcie adstajali pamiaškańnie. Praŭda, na nastupny dzień zajaviłasia MNS, a jašče praz čas — milicyja: maŭlaŭ, ananimnyja skarhi na prodaž bieł-čyrvona-biełaj simvoliki. Była jašče pravierka z padatkovaj. Nahoda — firmovy sajt, jaki nie źjaŭlajecca internet-kramaj, nie zarehistravany ŭ BiełHIE. Ale sajt jakraz u stadyi pierarehistracyi — technična ŭsie zajavy padadzieny, apłaty zrobleny.
Z usich pravierak Kryścina vyjšła biez pradpisańniaŭ. I voś učora — novyja viziciory.
«Pryjšoŭ supracoŭnik RUUS, nie naš učastkovy. U papierach ja ŭbačyła, što da ich pastupiła skarha ad pieršaha namieśnika mera Ihara Kvasoŭki. Nibyta 29 studzienia jon ab 11-j hadzinie byŭ u mianie ŭ kramie i bačyŭ niezarehistravanuju simvoliku. My pahladzieli kamiery za hety dzień — naturalna, tut čynoŭnika nie było. Dakumienta, jaki zabaraniaje handlavać rečami ź bieł-čyrvona-biełaj simvolikaj, mnie nie pakazali. Pa vyniku skłali pratakoł, što maje kubki i mahnity — heta pikiet».
Adna z supracoŭnic kramy tym časam razdrukavała fota, dzie Alaksandr Łukašenka prynosiŭ prysiahu pad nacyjanalnym ściaham. Pytajecca: heta pikiet? «Mała što vy zrabili tam u fotašopie!» — adreahavaŭ milicyjant.
Kryścina siońnia adniesła ŭ vykankam zapyt ab tłumačeńni zakanadaŭstva: kali ich krama štości parušaje, to niachaj spašlucca na kankretnyja artykuły.
Cikava, što jašče ŭ červieni dziaŭčyna atrymlivała dypłom z ruk pieršaha namieśnika mera.
«Jon kazaŭ, što vielmi rady, što ŭ horadzie jość pradpryjemstvy, jakija palapšajuć ekanamičnyja pakazčyki. Naša rekłamnaje ahienctva isnuje bolš za šeść hod, pracavała z vykankamam, rabiła dla ich stendy. Ja sama dyzajnier. Da mianie źviartalisia, kali treba było ad rajona adpravić paštoŭku na dzień narodzinaŭ prezidentu. Dyk voś bolšaść paštovak malavałasia majoj rukoj. U hetym hodzie ja admoviłasia.
Čuła, što pradpryjemstvam telefanavali, kazali nie źviartacca da nas pa rekłamu. Ale što paradavała — za ŭvieś čas paśla hetych padziej z nami admoviłasia pracavać tolki adna arhanizacyja, a ŭsie astatnija praciahvajuć».
