Na sajcie Minabarony Rasii źjaviŭsia tekst, aŭtar jakoha vinavacić Polšču ŭ pačatku druhoj suśvietnaj vajny. Dakumient dastupny ŭ raździele «Elektronnaja viersija „Vojenno-istoričieskoho žurnała“» pad zahałoŭkam «Vymysły j falsifikacyi ŭ acenkach roli SSSR napiaredadni j z pačatkam druhoj suśvietnaj vajny».
Jak piša aŭtar artykułu, načalnik navukova-daśledčaha adździeła vajennaj historyi Paŭnočna-Zachodniaha rehijona RF Instytuta vajennaj historyi Ministerstva abarony, kandydat histaryčnych navuk Siarhiej Kavaloŭ, «usie, chto niepraduziata vyvučaŭ historyju druhoj suśvietnaj vajny, viedajuć, što jana pačałasia z-za admovy Polščy zadavolić hiermanskija pretenzii».
«Adnak mienš viadoma, čaho ž mienavita damahaŭsia ad Varšavy Adolf Hitler.
Miž tym, patrabavańni Hiermanii byli davoli ŭmieranymi:uklučyć volny horad Dancyh u skład Treciaha rejcha, dazvolić pabudovu ekstraterytaryjalnaj šašejnaj darohi j čyhunki, jakija źviazali b Uschodniuju Prusiju z asnoŭnaj častkaj Niamieččyny», — piša Kavaloŭ.
Pavodle słoŭ aŭtara pracy, hetyja patrabavańni «ciažka nazvać nieabhruntavanymi», bo «pieravažnuju bolšaść žycharoŭ adarvanaha ad Niamieččyny pavodle Viersalskaj mirnaj damovy Dancyha składali niemcy, jakija ščyra chacieli ŭźjadnańnia z histaryčnaj radzimaj».
Razam z tym, piša Kavaloŭ, «imknučysia atrymać status vialikaj dziaržavy, Polšča nijakim čynam nie chacieła stanavicca mienšym partnioram Niamieččyny», tamu hetyja patrabavańni byli adrynutyja.
U źviazku z hetym varta pryhadać, što ŭ siaredzinie traŭnia prezydent Rasii Dźmitryj Miadźviedzieŭ padpisaŭ ukaz pra stvareńnie kamisii pry prezidencie «pa supraćdziejańni sprobam falsifikacyi historyi na škodu intaresam Rasii», paviedamlaje Lenta.Ru.