U čym abvinavačvali Siarhieja Sakuna?
Pavodle abvinavačańnia, pieršaha listapada 2020 hoda z 14 da 15 hadziny pa pr. Niezaležnaści ad doma 95a da doma 99 Siarhiej Sakun naŭmysna pryniaŭ udzieł u ruchu pa prajeznaj častcy, čym hruba parušyŭ hramadski paradak. Jon vykrykvaŭ łozunhi, uskidvaŭ ruki nad hałavoj i «ažyćciaŭlaŭ hučnyja vopleski». Znachodziŭsia ŭ sčepcy ŭ pieršych šerahach. Taksama jon nie padparadkavaŭsia nieadnarazovym zakonnym patrabavańniam supracoŭnikaŭ HUUS i ažyćciaviŭ pierakryćcio prajeznaj častki.
U toj dzień Siarhieja zatrymali, zatym jamu prysudzili aryšt pavodle č.1 art. 23. 34 KaAP (udzieł u niesankcyjanavanym masavym mierapryjemstvie). Pastanovu suda jon nie abskardžvaŭ.
Pakazańni śviedak
Imiony i proźviščy śviedak-milicyjantaŭ byli źmienienyja «u metach ich biaśpieki». Pieršy śviedka paviedamiŭ, što ŭ toj dzień znachodziŭsia na słužbie ŭ składzie mabilnaj hrupy z 5-6 čałaviek u rajonie Nacyjanalnaj biblijateki. U 14.00 im paviedamili pra ludziej u rajonie kramy «Charli Devidsan». Jany prybyli na miesca, vystrailisia ŭ šarenhu. Pierad kałonaj jechała mašyna DAI, adkul paviedamlali praz hučnahavaryciel, što mierapryjemstva niezakonnaje, prasili vyzvalić prajeznuju častku i razyścisia. Śviedka nie paznaŭ abvinavačanaha, skazaŭ, što jaho nie zatrymlivaŭ i apisać jaho dziejańni nie moža.
Druhi śviedka sa źmienienym proźviščam Nazaraŭ daŭ padobnyja pakazańni.
Taksama byli začytanyja pakazańni, dadzienyja padčas śledstva, śviedkami-amapaŭcami Kucharčykam i Śvirydavym (imiony źmienienyja).
Pazoŭ ad «Minsktransa» — bolš za 10 tysiač rubloŭ
Padčas pasiadžeńnia byŭ zajaŭleny pazoŭ ad «Minsktransa» za błakavańnie ruchu transpartu na sumu bolš za 10 tysiač rubloŭ. Prakuror Zubik prykłała hramadzianski pazoŭ na ŭsiu sumu ad prastoju transpartu pa ŭsim Minsku za dzień, nie vyłučyŭšy sumu pa tym rajonie na praśpiekcie Niezaležnaści, dzie prachodziła akcyja.
U sudzie ad «Minsktransa» vystupała juryskonsult Anastasija Kuźniacova, jakaja prosta začytała svaje słužbovyja abaviazki pradstaŭlać «Minsktrans» i ahučyła škodu ŭ 10 689 rubloŭ. Juryskonsult nie zmahła patłumačyć, čamu zajaŭlajecca mienavita takaja vialikaja suma.
Dalej zaprasili načalnika adździeła pieravozak «Minsktransa» Ramana Pranoviča, jaki pavinien byŭ usio ž taki rastłumačyć farmavańnie hetaj sumy. Jon doŭha raspaviadaŭ, jak vyličali škodu, nie pryvodziačy dakładnych formuł i ličbaŭ. Kali advakat paprasiła vyłučyć mienavita toj transpart, ruchu jakoha pieraškodziła akcyja na hetym učastku Niezaležnaści, jon nazvaŭ 5 maršrutaŭ aŭtobusaŭ i nivodnaha tralejbusnaha. Advakat prasiła ŭsio ž taki pryvieści dakładny raźlik škody, na što śviedka paviedamiŭ, što dakładny raźlik pieradavaŭsia ŭ prakuraturu. Sudździa zrabiła zaŭvahu prakuroru, skazaŭšy, što vyličyć sapraŭdny škodu pavinien byŭ čałaviek, jaki rychtavaŭ pazoŭ.
Što kazaŭ abvinavačany?
Na sudzie Siarhiej Sakun raspavioŭ, što pieršaha listapada pryjechaŭ u sałon A1, pryparkavaŭsia kala «Alaksandraŭskaha pasaža», ale sałon pracavaŭ da 14. Tamu jon zajšoŭ u kafe, paśla vyjšaŭ na vulicu i ŭbačyŭ natoŭp ludziej, zacikaviŭsia i dałučyŭsia da ich u rajonie pr. Niezaležnaści, 99. Zatym pryjechaŭ AMAP, bajcy stali ŭ šarenhu i zrabili streł u pavietra, a ŭ hety čas pierad im (Sakunom) stajali žančyny i dziaŭčaty. Jon vyjšaŭ na prajeznuju častku, kab prykryć ich, i padniaŭ ruki, demanstrujučy svaju biazzbrojnaść. U sčepcy nie stajaŭ, na prajeznuju častku vyjšaŭ nie bolš čym na 2 chviliny. Ni z kim z pratestoŭcaŭ nie znajomy. Užo adbyŭ aryšt pa 23.34, dzie nie było składu złačynstva.
Prakuror paviedamiła, što jość razychodžańni ŭ pakazańniach, dadzienych padčas śledstva i na sudzie. Pieršapačatkova abvinavačany paviedamlaŭ, što znachodziŭsia na prajeznaj častcy da 15 chvilin, a ciapier kaža, što ŭsiaho 2. Taksama tam śćviardžałasia, što jon vykazvaŭ svaju hramadzianskuju pazicyju i niazhodu z hvałtam, a na sudzie zajaviŭ, što abaraniaŭ dziaŭčat i žančyn.
Abvinavačany adkazaŭ, što jaho hramadzianskaja pazicyja nie maje dačynieńnia da sudu i što dźvie chviliny ŭpisvajucca ŭ pieryjad «da 15 chvilin», u hetym razychodžańniaŭ niama. Advakat spasyłałasia na stenahrafii videa, dzie prapisana, što jon byŭ tolki paŭtary chviliny na prajeznaj častcy.
Vyvučeńnie materyjałaŭ spravy
Zatym sud pierajšoŭ da vyvučeńnia materyjałaŭ spravy. Demanstravałasia videa, dzie vidać, što pryjechali ŭzbrojenyja strelbami ludzi ŭ zialonaj formie i pačali papiaredžvać ab niezakonnaści akcyi (hučnahavarycielaŭ nie było, nieadnarazova vykarystoŭvaŭsia mat). Na videa čutnyja streły. Ludzi razyšlisia pa chodnikach, vyzvaliŭšy prajeznuju častku. Abvinavačanaha na videa vidać drenna, zatym byŭ pakazany skrynšot ź im. Videa paćvierdziła, što na darozie jon byŭ usiaho paŭtary chviliny.
Sprečki bakoŭ
Prakuror paprasiła vyklučyć z abvinavačvańnia farmuloŭku pra ŭdzieł u «sčepcy», a taksama ŭličyć papiarednija pakazańni, dzie abvinavačany śćviardžaje, što znachodziŭsia na prajeznaj častcy «da 15 chvilin». Jana zapatrabavała dla Sakuna try hady abmiežavańnia voli z nakiravańniem u papraŭčuju ŭstanovu adkrytaha typu.
Na dumku advakata, pakazańni śviedak nie dakazali aktyŭnaha ŭdziełu abvinavačanaha ŭ pratestach, a tolki apisali atmaśfieru taho, što adbyvałasia ŭ toj dzień.
«Abvinavačany nie źjaŭlajecca aktyŭnym udzielnikam pratestaŭ, bo da taho dnia nie pryciahvaŭsia pa art. 23.34, choć pratesty doŭžylisia ŭžo bolš za try miesiacy. Sakun ŭžo adbyŭ aryšt za dadzienaje pravaparušeńnie. Stanoŭča charaktaryzujecca na pracy. U spravie niama pierapisak, dzie b jon damaŭlaŭsia z kim-niebudź ab udziele ŭ akcyi».
U vypadku, kali sud pryznaje Sakuna vinavatym, advakat paprasiŭ dać termin, roŭny ŭžo adsiedžanamu i vyzvalić u zale suda, kab abvinavačany moh viarnucca da siamji i zajmacca vychavańniem syna, a taksama pracavać u adpaviednaści sa svajoj kvalifikacyjaj.
Sudździa Dźmitryj Astapienka vynies roŭna taki prysud, jaki prasiła prakuror.
