Ministr finansaŭ Rasii prapanoŭvaje surjozna praanalizavać metazhodnaść pierachodu na adzinuju valutu ź Biełaruśsiu, paviedamlaje RIA Novosti.
Padčas sustrečy z žurnalistami 6 červienia ŭ chodzie Sankt-Pieciarburhskaha mižnarodnaha ekanamičnaha forumu Alaksiej Kudryn zajaviŭ:
"Z pazicyi Minfina treba surjozna pahladzieć na metazhodnaść pierachodu na adzinuju valutu z Respublikaj Biełaruś u suviazi ź niavyznačanaściu dziejańniaŭ biełaruskaha ŭrada".
Pry hetym kiraŭnik Minfina zaznačyŭ, što da apošniaha času pytańnie ab pierachodzie na adzinuju valutu zastavałasia na paradku dnia.
Kudryn taksama ličyć, što admova prezidenta Łukašenki ad prapanovy Rasii pierajści na adzinuju valutu ŭ svoj čas była pamyłkaj.
Ideja ŭviadzieńnia rasijskaha rubla ŭ jakaści adzinaj valuty abmiarkoŭvajecca kiraŭnictvam Rasii i Biełarusi ŭžo kala 15 hadoŭ. Płanavałasia, što z 1 studzienia 2005 hoda rasijski rubiel stanie adzinym płaciežnym srodkam na terytoryi dźviuch krain, a 1 studzienia 2008 hoda ŭ sajuznaj dziaržavie budzie ŭviedziena adzinaja valuta.
Płanam nie sudžana było ździejśnicca z-za pryncypovych roznahałośsiaŭ bakoŭ pa šerahu pazicyj, u tym liku pa pytańniach stvareńnia adzinaha emisijnaha centra. U Minsku zajavili, što ŭviadzieńniu adzinaj valuty pavinna papiaredničać stvareńnie adzinaj ekanamičnaj i mytnaj prastory, a taksama roŭnych umoŭ dla subjektaŭ haspadarańnia i nasielnictva ŭ ekanomicy i sacyjalnaj śfiery.
3 lutaha 2009 hoda paśla pasiadžeńnia vyšejšaha dziaržsavieta sajuznaj dziaržavy pamočnik prezidenta Rasii Siarhiej Prychodźka paviedamiŭ žurnalistam, što Rasija i Biełaruś raspracavali płan sumiesnych dziejańniaŭ pa ŭviadzieńni adzinaj valuty — rubla, raźličany na adzin hod.
9 lutaha ministr zamiežnych spraŭ Biełarusi Siarhiej Martynaŭ u efiry Pieršaha nacyjanalnaha telekanała zajaviŭ: «Pytańnie ab uviadzieńni rasijskaha rubla ŭ jakaści adzinaj valuty sajuznaj dziaržavy ni na praviedzienym VDS, ni padčas jaho padrychtoŭki, ni naohuł, ščyra kažučy, za apošnija dva-try hady nichto na surjoznym uzroŭni nie staviŭ».
Jon udakładniŭ, što na vyšejšym dziaržsaviecie havorka išła pra rolu rasijskaha rubla jak rehijanalnaj reziervovaj valuty na postsavieckaj prastory ŭ jakaści valuty, jakaja b vykarystoŭvałasia pieravažna ŭ raźlikach.
Martynaŭ padkreśliŭ, što biełaruski bok zaŭsiody vystupaŭ za pierachod na adzinuju valutu. «Ale heta pavinna być zaviaršeńniem pracesu — harmanizacyi ekanomiki, uzajemadziejańnia ekanomiki», — skazaŭ jon.
20 sakavika paśla pasiadžeńnia sumiesnaj kalehii ministerstvaŭ finansaŭ Biełarusi i Rasii ŭ Minsku Alaksiej Kudryn zajaviŭ, što dla ŭviadzieńnia ŭ ramkach Sajuznaj dziaržavy adzinaj valuty patrebnyja bolš stabilnyja ekanamičnyja ŭmovy.
«Prapanovy pa ŭviadzieńni adzinaj valuty jość. Miechanizm uviadzieńnia takoj valuty raspracavany, padrychtavany nieabchodnyja narmatyŭnyja dakumienty», — skazaŭ jon. Pry hetym kiraŭnik Minfinu Rasii zaznačyŭ, što «va ŭmovach suśvietnaha finansava-ekanamičnaha kryzisu jość svaje za i suprać u adnosinach da hetaha pytańnia».
«Ja b aścieražniej staviŭsia da hetaha ciapier, kali jość značnyja źmieny ŭ płaciežnych bałansach našych krain, jość istotnyja źmieny ŭ valutnych reziervach», — zajaŭlaŭ tady Kudryn.
