«Kab my i naša Baćkaŭščyna vylečylisia ad hramadska-palityčnaj prakazy»: arcybiskup Kandrusievič adkryŭ došku Damielu
14 lutaha ŭ minskim kaściole Uzvyšeńnia Śviatoha Kryža, što na Kalvaryjskich mohiłkach, Hanarovy mitrapalit Minska-Mahiloŭski arcybiskup Tadevuš Kandrusievič błasłaviŭ pamiatnuju došku biełaruskamu mastaku pačatku XIX st. Janu Damielu, paviedamlaje catholic.by.
Jan Damiel byŭ pachavany ŭ krypcie jašče niedabudavanaha kaścioła Uzvyšeńnia Śviatoha Kryža na Kalvaryjskich mohiłkach u Minsku.
«Nad mahiłaj mastaka ŭ centralnym ałtary kaścioła byŭ źmieščany abraz «Maleńnie ab čašy», jaki ličycca najlepšym jaho tvoram. Hetaje pałatno stała svojeasablivym pomnikam mastaku i zamianiła jamu nadmahille», — śćvierdziŭ ijerarch.
Pry hetym mitrapalit źviarnuŭ uvahu na niebiaśpiečnuju duchoŭnuju i hramadska-palityčnuju prakazu sučasnaha śvietu: «Heta prakaza materyjalistyčnaha ateizmu, niazhodnaha z Božym zakonam seksualnaha žyćcia, hnievu, nianaviści, sacyjalnaj niespraviadlivaści, hvałtu, teraryzmu, vajny».
Jak padkreśliŭ ijerarch, «Kaścioł, pavodle svajho sacyjalnaha vučeńnia, abaviazany vykazvacca adnosna pytańniaŭ maralnaści, baranić pakryŭdžanych i dapamahać u vyrašeńni prablem, ź jakimi sutykajecca hramadstva».
«Adnak zaklik Kaścioła i inšych relihijnych supolnaściaŭ da malitvy, pakajańnia i dyjałohu ihnarujecca, — praciahvaŭ mitrapalit Kandrusievič. — Heta nie dazvalaje Jezusu vylečyć chvarobu hramadskaj prakazy».
Tamu, jak adznačyŭ arcypastyr, aktualnymi źjaŭlajucca słovy Śviatoha Ajca Franciška, pramoŭlenyja 8 lutaha padčas aŭdyjencyi dla dypłamatyčnaha korpusu, akredytavanaha pry Śviatym Pasadzie:
«Palityčny kryzis u śviecie ŭzmocniŭsia z pryčyny pavyšeńnia ŭzroŭniu palityčnych supiarečnaściaŭ i adsutnaści supolnaha pošuku vyrašeńnia prablem, što zakranajuć płanietu».
«Niachaj siońniašniaje Božaje słova i mastackaja tvorčaść Jana Damiela dapamahajuć nam imknucca da duchoŭnaj pryhažości, kab my i naša Baćkaŭščyna vylečylisia ad hrešnaj i hramadska-palityčnaj prakazy z metaj budavańnia žadanaha miru i supakoju»,— zaklučyŭ mitrapalit Kandrusievič.
Kamientary