Hrodzienskaha žurnalista papiaredzili ab tym, što jon nie maje prava pradstaŭlacca staršynioj Hałoŭnaj Rady «Sajuza palakaŭ na Biełarusi», a taksama aficyjna zabaranili karystacca simvolikaj SPB.
Siońnia siabra apalnaha Sajuza palakaŭ na Biełarusi Andreja Pačobuta vyklikali ŭ prakuraturu Hrodzienskaj vobłaści.
Namieśnik načalnika adździeła abłasnoj prakuratury Karavajeŭ začytaŭ jamu aficyjnaje papiaredžańnie ab niedapuščeńni parušeńnia zakanadaŭstva RB. Pačobuta papiaredzili ab tym, što jon nie maje prava pradstaŭlacca staršynioj Hałoŭnaj Rady «Sajuza palakaŭ na Biełarusi», a taksama aficyjna zabaranili karystacca simvolikaj SPB. Nahodaj dla papiaredžańnia staŭ list z Hienprakuratury, kudy naprykancy sakavika SPB na čale z Anžalikaj Borys źviarnulisia ŭ suviazi z pakazanym na Pieršym nacyjanalnym kanale siužetam, pryśviečanym praviadzieńniu VII źjezda Sajuza palakaŭ na Biełarusi15 sakavika ŭ Hrodnie. Toj zvarot u jakaści staršyni Hałoŭnaj Rady «Sajuza palakaŭ na Biełarusi» padpisaŭ A. Pačobut.
«Usia pracedura zaniała 5‑7 chvilin: mnie začytali papiaredžańnie, prapanavali padpisacca, što ja ź im aznajomiŭsia» — raspavioŭ sp. Pačobut i dadaŭ, što supracoŭniki prakuratury vyhladali stomlenymi i nie vyjaŭlali asablivaha žadańnia dyskutavać. «Ja admoviŭsia padpisać tuju papieru, bo mnie nie vydali kopiju, skazaŭšy, što heta nie praduhledžana zakonam. Tady vyklikali dvuch supracoŭnikaŭ i ŭ ich prysutnaści padpisali dakumient za mianie» — patłumačyŭ žurnalist. Pa jaho słovach, sprava z papiaredžańniem naŭrad ci buzie mieć praciah, bo ŭ takim razie daviadziecca raspačynać kryminalnuju spravu, a heta ŭ svaju čarhu moža pralić śviatło na ŭdzieł dziaržavy ŭ padziejach vakoł Sajuzu palakaŭ u 2005 hodzie. «Siońnia my majem vusnyja śviedčańni ludziej, jak tady ŭłady arhanizoŭvali «svoj» źjezd, u vypadku śledstva my zmožam pabačyć i kankretnyja dakumienty» — miarkuje A. Pačobut.
Heta nie pieršaje papiaredžańnie prakuratury datyčna Pačobuta. U 2005 hodzie prakuratura papiaredžvała A. Pačobuta ŭ jakaści hałoŭnaha redaktara časopisu SPB «Mahazyn Polski».
