Jak dziejańni ZŠA suprać Rasii ŭpłyvajuć na adnosiny ź Niamieččynaj i Kitajem?

Z adnaho boku, Bajden demanstruje, što sproby pierazahruzki adnosin z Rasijaj nie budzie, ale ŭ toj ža čas lidar šukaje mahčymaści dla supracoŭnictva ŭ halinach, da jakich majuć cikavaść abodva baki, piša The National Interest.

Tamu novy pakiet sankcyj suprać Rasii možna acharaktaryzavać jak pošuk kampramisu. Heta źjaŭlajecca sprobaj ZŠA zbałansavać supiarečlivyja nacyjanalnyja intaresy.

Z samaha pieršaha dnia administracyja Bajdena chacieła, kab jaje palityka z Rasijaj adroźnivałasia ad toj, što pravodziŭ Tramp i jaho papiaredniki. Uviedzienyja sankcyi musili pakazać, što novaja administracyja budzie reahavać na dziejańni Rasii, jakija Vašynhton ličyć niapravilnymi.

Adnak charaktar hetych sankcyjnych mier śviedčyć pra toje, što ŭ kamandy Bajdena pa nacyjanalnaj biaśpiecy niama adkazaŭ na dva važnyja pytańni. Pytańnie pieršaje: ci nie pieražyvaje ciapier Rasija zaniapad krynic dla svajoj dziaržaŭnaj mocy i ci nie stračvaje praz heta režym svaju lehitymnaść? Pytańnie druhoje: ci vartyja bolš žorstkija miery suprać Maskvy taho, kab z pryčyny ich stracić padtrymku Rasii ŭ realizacyi važnych amierykanskich inicyjatyŭ (u pryvatnaści, pa Iranie i Paŭnočnaj Karei).

U ZŠA mnohija členy Kanhresa, prytym z abiedźviuch partyj, pierakananyja, što Rasija nie budzie ni ŭ jakim razie dapamahać ZŠA, a tamu sankcyi, uviedzienyja Bajdenam, zasłabyja. Adnak administracyja prezidenta pakul nie ŭpeŭnienaja, što rasijski režym pierajšoŭ u stadyju zaniapadu, a tamu nie zmoža adkazać na amierykanskija sankcyi.

Na fonie hetych debataŭ uźnikaje pytańnie nakont taho, jak dziejańni ZŠA paŭpłyvajuć na važnyja dla dziaržavy adnosiny z Hiermanijaj i Kitajem.

Anhieła Mierkiel nie padtrymlivaje toj nakirunak, jaki abrała pucinskaja Rasija, ale ŭ toj ža čas Hiermanija nie pojdzie pa tym šlachu, jaki abrali ZŠA. Hiermanija, a razam ź joju i ŭvieś ES, zacikaŭlenyja ŭ adnosinach z Rasijaj, što nie moža ihnaravać ZŠA. Tamu kali ŭźnikła pytańnie z Navalnym, administracyja Bajdena vyrašyła nie pieravyšać miery, pryniatyja ES u adnosinach da Rasii.

Da taho ž, jak miarkujuć pradstaŭniki aparatu nacyjanalnaj biaśpieki Bajdena, hałoŭnym stratehičnym kankurentam ZŠA źjaŭlajecca Kitaj, a šmat uvahi Rasii daść Kitaju mahčymaść umacoŭvać svaje pazicyi. Bolš za toje, pakolki suadnosiny sił pastupova źmianiajucca na karyść Kitaja, Rasija moža pierahledzieć hłybiniu svajho stratehičnaha partniorstva z hetaj dziaržavaj.

Tamu ŭ palitycy Bajdena prajaŭlajucca rysy palityki Baraka Abamy, jaki imknuŭsia zrabić tak, kab u sankcyjach suprać Rasii byli praduhledžanyja mahčymaści dla narmalizacyi adnosin. A Bajden, kab zaručycca padtrymkaj ES u adnosinach ZŠA z Kitajem, vymušany iści na kampramis z Hiermanijaj u pytańniach palityki z Rasijaj.

U toj ža čas Bajden moža zajaŭlać, što adreahavaŭ na niezakonnyja dziejańni Rasii i abaraniŭ amierykanskija kaštoŭnaści. Adnak jaho krytyki abaviazkova adznačać, što sankcyi ŭ asnoŭnym majuć simvaličny charaktar i nie stanuć udaram dla Rasii.

• 0
• 0
• 0
• 0
• 0
• 0
• 0
• 0