Fota Depositphotos.com
Za hałoŭnuju ŭznaharodu «Najlepšy film» buduć zmahacca kinakarciny «Mank», «Baćka», «Iuda i čorny miesija», «Minary», «Dziaŭčyna padaje nadziei», «Sud nad čykahskaj siamiorkaj», «Ziamla kačeŭnikaŭ» i «Huk mietału».
Lidaram pa kolkaści naminacyj staŭ film «Mank» režysiora Devida Finčara. Hety čorna-bieły film ad Netflix raspaviadaje historyju scenarysta Hiermana Dž. Mankieviča, jaki pracavaŭ nad scenarom da filma «Hramadzianin Kiejn». Ahułam «Mank» atrymaŭ 10 naminacyj, u tym liku za najlepšuju režysuru, paviedamlaje The Wall Street Journal.
Film «Ziamla kačeŭnikaŭ» režysiorki Chłoi Čžaa, jaki niadaŭna atrymaŭ premiju «Załaty hłobus» za najlepšuju dramu, a taksama sabraŭ šmat stanoŭčych vodhukaŭ kinakrytykaŭ, zamacavaŭ svoj status pretendenta na premiju «Oskar». Hetu karcinu naminavali va ŭsich klučavych katehoryjach: za najlepšuju režysuru, scenar i mantaž.
U naminacyju «Najlepšy režysior», akramia Devida Finčara i Chłoi Čžaa, taksama trapili Tomas Vinterbierh («Jašče adzin raŭnd»), Emirald Feneł («Dziaŭčyna padaje nadziei») i Li Ajzek Čun («Minary»). Heta pieršy vypadak, kali ŭ adzin hod za najlepšuju režysuru naminavali bolš za adnu žančynu. Ahułam tolki 5 žančyn traplali ŭ hetu naminacyju za ŭsiu historyju premii.
Čedvik Boŭzman, jaki pamior letaś va ŭzroście 43 hadoŭ, byŭ naminavany za najlepšuju mužčynskuju rolu ŭ filmie «Ma Rejni: maci bluza». U hetu naminacyju taksama trapili Ryz Achmied («Huk mietału»), Entani Chołkins («Baćka»), Hery Ołdman («Mank») i Styvien Jun («Minary»).
Naminacyju za najlepšuju žanočuju rolu atrymali Hlen Kłoŭz («Elehija Chiłbili»), Alivija Kołman («Baćka»), Maryja Bakałova («Borat»), Amanda Siejfryd («Mank») i Jun Ju Junh («Minary»).
Upieršyniu naminacyi atrymała Apple za najlepšy animacyjny film «Lehienda pra vaŭkoŭ» i «Hrejchaŭnd» (za najlepšy hukavy mantaž).
